Ouvir RAFA Ritmo, Voz e Coração de Timor
Pesoál Saneamentu husi Munisípiu Díli kontinua hamos foer sira iha komunidade kapitál Díli sira-nia uma tatis. Imajen/AMD
Díli, 26 Outubru 2026 (RAFA) — Autoridade Munisipál Díli (AMD) sei aloka orsamentu ho montante millaun 21 USD iha tinan 2027 hodi prioritiza ba jestaun lixu, manutensaun jardim públiku no hadi’a funsionamentu estasionamentu sira iha kapitál Díli.
Prezidente Autoridade Munisipál Díli, Francisco dos Santos, Segunda ne’e, esplika katak programa sira ne’e sai prioridade iha planeamentu orsamentu ba tinan oin mai.
“Ita sei hetan alokasaun orsamentu besik millaun 21 USD. Primeira jestaun lixu iha kapitál Díli, Segundu, ita haree ba funsionamentu makina sira no manutensaun jardim públiku. Aleinde ne’e, ita hakarak hadi’a funsionamentu estasionamentu sira atu bele aumenta reseita ba kofre Estadu,” hateten Francisco dos Santos ba jornalista sira, iha nia knar fatin.
Ezekusaun orsamentu 2026 atinje Progresu Aas
Kona-bá ezekusaun Orsamentu Jerál Estadu (OJE) ba 2026, Francisco dos Santos informa katak Autoridade Munisipál Díli konsege ezekuta orsamentu ho progresu ne’ebé varia tuir kategoria despeza.
Nia relata kona-bá ezekusaun ba saláriu no vensimentu atinje besik pursnetu 72, enkuantu despeza ba bens no servisu atinje pursentu 93.
Iha kategoria transferénsia públika ezekusaun atinje besik pursentu 93, ba kapitál menór , ezekusaun pursentu 96 no kapitál dezenvolvimentu ezekusaun atinje pursentu 99,3.
Prezidente AMD mós informa katak Programa Merenda Eskolár tama ona iha faze finál, no hein de’it prosesu pagamentu atu kompleta. Nia mós temi katak iha persentajen pursentu 4 ne’ebé relasiona ho insentivu ba autoridade lokál sira.
Fransisco dos Santos hato’o esperansa katak, to’o iha 31 Dezembru 2026, Autoridade Munisipál Díli bele atinje ezekusaun orsamentu to’o 100%.
AMD ezekuta US$4,329,774,19
Ba tinan fiskál 2026, Autoridade Munisipál Díli hetan alokasaun orsamentu ho montante 19.478.239,00 USD. Husi montante ne’e, orsamentu ne’ebé ezekuta ona hamutuk 14.329.774,00 USD.
Dadus ne’e hatudu katak AMD kontinua ezekuta orsamentu ba programa no atividade sira ne’ebé planeia ona durante tinan fiskál 2026.
Mudansa regra finanseira sai dezafiu
Maski ezekusaun orsamentu hatudu progresu, Franscsco dos Santos, esplika katak AMD hasoru dezafiu balu iha jestaun finanseira, liuliu kona-bá utilizasaun poupansa ne’ebé mosu husi prosesu tenderizasaun no mudansa iha regra finanseira.
Nia hatutan, bainhira prosesu tenderizasaun remata ho folin ne’ebé ki’ik liu husi orsamentu planeadu, iha poupansa ne’ebé bele konsidera atu responde ba nesesidade seluk. Maibé, iha situasaun balu, proposta atu uza fali poupansa ne’e la hetan aprovasaun husi Ministériu Finansas.
Estasionamentu no Arendamentu Sai Fonte Reseita
Iha parte seluk, Francisco dos Santos, hakuir AMD iha fonte reseita oioin, inklui estasionamentu, publisidade no arendamentu ba fatin sira ne’ebé pertense ba Autoridade Munisipál Díli.
Nia esplika katak reseita sira ne’e importante atu kontribui ba kofre Estadu, no AMD kontinua haree ba oportunidade sira atu hadi’a jestaun reseita, liuliu liuhusi funsionamentu estasionamentu no utilizasaun propriedade munisipál.
Autoridade Munisipál Díli kontinua implementa programa no atividade sira ne’ebé planeia ona, ho objetivu atu hadi’a servisu públiku, asegura manutensaun infraestrutura no aumenta efisiénsia jestaun orsamentu iha kapitál Díli.
Jornalista : Remigia Locatelli
Written by: RafaFM
2027 AMD Aloka Millaun 21 USD Ba Jestaun Lixu ho Manutensaun Jardim iha Díli
todayNovember 20, 2026 11 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt