2026, Governu Halo Ona Pagamentu Ba Projetu 466 ho Totál Orsamentu Millaun 117 USD

Diretór Ezekutivu ADN, Januário Guterres.

Díli, 13  Agostu  2026 (RAFA)-  Diretór Ezekutivu Ajénsia Dezenvolvimentu Nasionál (ADN), Januário Guterres, informa tinan ne’e, Governu halo ona pagamentu ho montante orsamentu millaun 117 USD  ba projetu hamutuk 466 iha teritóriu nasionál.

Diretór Ezekutivu ADN, Januário Guterres, informa asuntu ne’e liuhosi nia aprezentasaun relatóriu ADN nian iha sorumutuk Governu ho setór privadu nasionál, Kinta-ne’e, iha Díli.

Januário Guterres afirma, kategória projetu sira ne’ebé halo ona pagamentu  mai husi projetu fundu infraestrutura, kapitál dezenvolvimentu ne’ebé orsamentu aloká iha liña ministérial sira, projetu dezenvolvimentu munisípiu (PDM), projetu ne’ebé finánsia husi fundu espesiál dezenvolvimentu (RAEOA), fundu espesial dezenvolvimentu Ataúro  (FEDA) no  projetu husi subvensaun públika.

Husi projetu kategória lima ne’e katak totál projetu loloos  2.603  ne’ebé mak ho nia totál alokasaun orsamentu millaun 401 USD ba tinan 2026.

Diretór Ezekutivu ADN  ne’e espliká orsamentu  fundu infraestrutura iha millaun 240  USD, kapitál kapitál dezenvolvimentu millaun 108 USD, PDM millaun  27 USD, fundu espesiál dezenvolvimentu RAEAO millaun 23 USD, fundu espesial dezenvolvimentu Ataúro millaun 2.9 USD.

“Husi orsamentu ne’ebé alokadu to’o horisehik pedidu pagamentu projetu sira ne’ebé mak setór privadu husu ona pagamentu hamutuk 466 projetu ne’ebé mak kompostu husi Fundu Infraetrutura 188 projetu, iha kapital dezenvolvimentu liña Ministérial 196 projetu,  PDM 49 projetu,  FED RAEOA 13 projetu,  FEDA 5 projetu no subvensaun públika 15 projetu,” hatete Diretór Ezekutivu ADN Januário Guterres.

Diretór ADN adianta tan husi projetu ne’ebé mak husu ona pagamentu to’o agora Governu ezekuta ona kuazé  millaun 117 USD  kompostu husi  fundu infraestrutura ezekusaun 36%, kapitál dezenvolvimentu 19%, PDM 13%,  FED RAEOA 25%, FEDA 39%  no subvensaun públika 29%.

Jornalista: Zita Menezes