01 Setembru 2026, Restus Mortais Bispu Timoroan Na’in-Tolu To’o iha Díli

Ministru Administrasaun Estatál, Tomas do Rosário Cabral.

Díli, 31 Jullu 2026 (RAFA.TL) – Ministru Administrasaun Estatál, Tomas do Rosário Cabral, konfirma katak Governu Timor-Leste hamutuk ho Igreja Katólika sei translada restus mortais Bispu Timoroan na’in-tolu husi Portugal mai Timor-Leste iha loron 01 fulan-Setembru 2026.

Ministru Tomas do Rosário Cabral hateten katak preparasaun tékniku envolve ministeriu relevante sira no Igreja Katólika, ne’ebé reprezenta husi Sua Eminénsia Dom Virgílio Cardeal do Carmo da Silva, SDB atu asegura prosesu transladasaun restus mortais husi Portugal to’o Timor-Leste lao ho di’ak.

“Papel Governu nian maka fasilita no apoia Igreja hodi lori restus mortais sira mai Timor-Leste, depois entrega ba Konferénsia Episkopál Timorense (CET),”  Ministru Tomas Cabral informa iha reuniaun koordenasaun kona-bá preparasaun prosesu transladasaun ne’ebé  hala’o iha Ministériu Administrasaun Estatál, Sesta-ne’e.

Restus mortais Bispu Timoroan na’in-tolu ne’ebé sei translada mai Timor-Leste maka Dom Jaime Garcia Goulart, Primeiru Bispu Timor (1941–1967); Dom José Ribeiro, Bispu Dioseze Díli (1967–1977) ho Mgr. Martinho da Costa Lopes, Bispu Dioseze Díli (1978–1983).

Atu garante eventu ne’e la’o ho seguransa no orden, Ministériu Administrasaun Estatál halo koordenasaun ho Ministériu Interiór, Ministeriu Defeza, Ministériu Transportes no Komunikasaun, Rádiu Televizaun Timor-Leste, Autoridade Aeroportu no entidade relevante seluk.

Restus mortais sira sei simu iha Aeroportu Díli, depois entrega ba CET, lori ba Laleia, halo omenajen iha pontu balu, no ikus mai Tasi-Tolu tuir ajenda Igreja nian.

Tuir regra Portugal nian, autoridade sira iha ne’ebá maka sei hasai restus mortais husi fatin rai-mate antes entrega ofisiál ba Governu no Igreja Timor-Leste. Delegasaun Portugal mós sei akompaña transportasaun ne’e to’o Timor-Leste.

Parte seguransa, FALINTIL-Forsa Defeza Timor-Leste (F-FDTL) sei responsabiliza ba guarda de honra durante serimónia sira.

Agenda importante sira sira iha prosesu transladasuan restus mortais bispu timoroan na’in-tolu ne’e nian mak hanesan;  iha loron 18 Agostu 2026 – Missa agradesimentu iha Igreja Évora, prezide husi Bispu Dioseze Baucau, Dom Leandro Maria Alves. Governu Timor-Leste sei reprezenta husi Ministru Planeamentu, Investimentu no Estratéjiku, Gastão de Sousa.

Iha loron 19 Agostu 2026 – Missa agradesimentu iha Katedral Évora, prezide husi Patriarka Lisboa, ho prezensa Nunsiatura Apostólika no Governu Portugal, antes entrega ofisiál restus mortais ba Governu no Uma Kreda Lokal Timor-Leste.

Iha loron 22 Agostu 2026 – Kaixaun sira sei taka metin no ekipa Timor-Leste sei simu dokumentasaun no prepara urna sira atu transporta ba Bali.

Iha loron 01 Setembru 2026 – Restus mortais bispu na’in-tolu sei to’o iha Díli. Depois simu iha aeroportu, sei lori ba Tasi-Tolu no rai hamutuk ho restus mortais Dom Alberto Ricardo durante loron-10 ba orasaun, velóriu no selebrasaun missa.

Iha loron 3 Setembru 2026 – Restus mortais Mgr. Martinho da Costa Lopes sei lori ba Manatuto atu komunidade lokal bele halo omenajen durante kalan ida, antes fila-fali mai Díli iha loron 4 Setembru.

Iha loron 10 Setembru 2026 – Tuir oráriu fúnebre, restus mortais bispu na’in-haat sei halot iha Parókia Nossa Senhora Imaculada Conçeição Katedral Díli.

Prosesu ida ne’e konsidera nu’udar momentu istóriku ida ba Igreja Katólika no povu Timor-Leste, atu fó omenajen ikus ba líder relijiozu sira ne’ebé kontribui boot ba dezenvolvimentu Igreja no nasaun.

Jornalista: Remigia Locatelli