01 Outubru, Abertura Selebrasaun Dili Day Ba Dala-257

Serimonia angariasaun fundu ba selebrasaun Dili Day ba dala-257, Kinta-kalan 17 Setembru 2026.

Díli, 18 Setembru 2026 (RAFA) – Prezidente Autoridade Munisípiu (PAM) Díli, Francisco dos Santos, ofisialmente anunsiu  abertura selebrasaun ‘Dili Day’ ba dala-257 realiza iha loron 01 to’o loron 10 fulan-Outubru 2026  ne’ebé sei  konsentra iha arredór Igreja Motael nia sorin.

Anunsiu ne’e fó sai iha kalan angriasaun fundu nian ne’ebé hala’o iha Postu Administrativu Cristo Rei, Kinta-kalan, hamutuk ho kompañia nasionál no internasionál hamutuk 35 sai nu’udar patrosinadór ba eventu Dili Day ba dala-257.

Francisco dos Santos informa katak, objetivu hosi kalan angriasaun ne’e hodi buka fundu hosi parseiru privadu sira, hodi suporta atividade selebrasaun. Ida-ne’e akontese tanba atividade Dili Day (loron Dili nian) rasik seidauk ofisializa hosi Governu, nune’e mós seidauk preve orsamentu rasik hosi Estadu.

“Maske to’o ona tinan 257, Estadu no Governu seidauk ofisializa loron 10 fulan-Outubru nu’udar aniversáriu sidade Díli nian. Tanba ne’e, kada tinan autoridade sempre husu tulun no koopera hamutuk ho kompañia sira hodi realiza nafatin selebrasaun ne’e,” Prezidente Autoridade Munisípiu Díli ne’e esplika.

Durante selebrasaun loron sanulu nia laran, PAM Díli sei organiza atividade oioin, inklui feira kulinária no artezenatu iha igreja Motael nia sorin, ne’ebé aberta públiku ne’ebé hakarak fa’an hodi nune’e bele tulun ekonomia família.

Aleinde feira, sei iha mós diskursu públiku no konkursu públiku g entre estudante eskola sekundária sira, festa populár entre komunidade sira ne’ebé maka rejistu ona iha Autoridade Munisípiu Dili.

Kona-bá tema selebrasaun nian, PAM Díli relata katak esbosu tema nian prontu ona, maibé sei rona tan hanoin hosi membru governu balun hodi hetan konsensu molok publika.

Iha biban ne’e, Francisco dos Santos mós fó rekoñesimentu no agradesimentu boot ba kontribuisaun hosi PAM sesante (eis-prezidente sira) ne’ebé fó ona sira-nia kontribuisaun ba sidade Díli.

Nu’udar lideransa foun, nia reafirma ninia kompromisu hodi servisu hamutuk ho entidade hotu hodi konkretiza lema “Hamurak Díli”.

Jornalista: Remigia Locatelli