Xanana husu Mídia iha Timor-Leste Tenke Sai Ajente Kontrolu Sosiál

PM Kay Rala Xanana Gusmão partisipa iha programa Meet The PRESS, Segunda (22/12/2025) Imajen/Rafa.tl

DILI, RAFA.tl– Primeiru-Ministru (PM), Kay Rala Xanana Gusmão husu ba mídia iha Timor-Leste tenke sai ajente kontrolu sosiál, halo krítika konstrutivu atu hadi’a nasaun ne’e ba oin.

Xefe Governu, Kay Rala Xanana Gusmão hato’o deklarasaun ne’e ba jornalista sira hamutuk ho mídia na’in sira iha Programa Meet the Press, iha salaun apuramentu CNE, Colmera, Segunda (22/12/2025), ho tema “Papel Média no Pilar Demokrasia Iha Prosesu Konstrusaun Estadu no Nasaun”.

Xanana Gusmão hatete, liga ba tópiku ne’ebé ko’alia iha prosesu rua, ida maka konstrusaun estadu ne’ebé foku liubá instituisaun sira ne’ebé servisu ba estadu no prosesu ida tan maka konstrusaun nasaun maka estadu povu no instituisaun sira seluk liu-liu mídia.

“Nu’udar jornalista tenke kontribui no prevene autoritarizmu no abuzu poder, labele buka informasaun ne’ebé sensasional bei-beik, tenke buka aprende no hatene situasaun hotu-hotu iha mundu. Krítika hodi buka hadi’a no bolu intensaun atu hadi’a,” antigu jornalista  ne’e hateten.

Xefe Governu dehan, husi tempu rezisténsia to’o pro-independénsia to’o períodu Timor-Leste ukun an tinan 23 ona, mídia iha Timor-Leste la’ós hanesan kanál informasaun, maibé sai hanesan mós instrumentu ida ba libertasaun tempu pasadu no sai mós hanesan instrumentu ba edukasaun sívika no instrumentu ba kontrolu sosiál.

Tuir Xanana. mídia sai mós hanesan lian ba povu, mídia bele fó sai buat ne’ebé di’ak, mídia tenke fó sai tuir nia misaun, iha liberdade nia laran, demokrasia nia laran.

Xanana Gusmão argumenta, Timor-Leste loke espasu ba liberdade espressaun, loke espasu ba liberdade tenke buka tuir sala no loos iha ne’ebé no hametin konsiénsia nasionál iha momentu ne’ebé nasaun buka hela atu hadi’a an.

Nia dehan jornalista tenke koñese mundu, tenke akompaña mundu, labele observa de’it situasaun iha rai laran, tenke observa mós situasaun globál.  Tanba ko’alia kona-bá demokrasia, kona-bá liberdade imprensa, ne’ebé diferénsa iha nasaun hotu-hotu, mídia sai hanesan ai-rin ida ho pilar ne’ebé importante tebes ba demokrasia, tanba liu husi publikasaun iha jornál, televizaun no online sira povu hatene prosesu demokrasia, polítika, hodi fó mós espasu ba opiniaun públika.

Reportajen ekipa Rafa.tl