Xanana Husu Forsa Tarrefa Apoiu Umanitáriu Ba Filipina Kumpre Misaun no Servisu ho Laran

Primeiru-Ministru Kay Rala Xanana Gusmão enkoraja forsa konjunta apoiu umanitária ba Filipina servisu ho laran. Imajen/Média G-PM

DILI, RAFA.tl– Primeiru-Ministru (PM), Kay Rala Xanana Gusmão, husu ba  forsa tarrefa apóiu umanitáriu ba Filipina atu kumpre misaun no servisu ho laran hodi apoiu no tulun vítima dezastre naturál iha Filipina.

“Ami fó fiar tomak ba imi, la’ós atu foti Timor-Leste nia naran atu hatudu katak Timoroan, maibé nu’udár timoroan, komprometidu atu ajuda  sé de’it mak presiza. Ajuda ho fuan, ajuda  la’ós dehan ida ne’e ida ne’ebá, lae! Ajuda ho laran tomak,” Primeiru-Ministru Kay Rala Xanana Gusmão hateten bainhira halo despedida ho kontijente forsa tarrefa konjunta na’in-150 ne’ebé sei aranka ba halo misaun umanitária iha Filipina iha Kuartel Jenerál F-FDTL, Fatuhada, Tersa (11/11/2025).

Xefe Governu husu ba forsa tarrefa konjunta ne’ebé atu halo misaun umanitária iha Filipina tenke servisu ho responsabilidade, tenke tulun povu Filipinu  ne’ebé hetan dezastre.

“Imi  servisu maka’ás, kuandu imi servisu maka’ás ne’e ajuda tebes, imi  tenke foer maka’ás, imi foer ne’e la buat ida, ne’ebé ami  fiar ba imi  katak imi ba ho laran tomak, ho isin tomak, ho imi nia vontade tomak atu servisu atu ajuda sira. Liliu imi sira forsa, hodi hatudu iha ASEAN tomak katak Estadu la’ós prepara ami atu funu, maibé prepara ami atu ba halo ajuda umanitáriu,” Xanana Gusmão afirma.

Xefe Governu enkoraja  misaun ne’ebé forsa tarrefa konjunta ba apoia umanitária iha Filipina ne’e atu hatudu kompromisiu ba rai ida ne’e katak ba  atu ajuda la’ós ba atu pasiar.

“Imi nia kompromisiu ba rai ne’e no ba iha misaun ida ne’e mak ba atu ajuda la’ós ba atu pasiar. Ba atu halo, ba atu kaer, ba atu hafoer aan. Ne’ebé imi ba imi ida di’ak reprezenta povu ida ne’e kole bele  kole, mora bele  moras, maibé enkuantu ita  bele ne’e ha’u hatudu katak ita ba ne’e la’ós atu foti Timor-Leste nia naran, ita ba ne’e atu fó apoiu,” Xanana salienta.

Iha misaun ida ne’e la’ós atu foti Timor nia naran, buat hanesan ne’e hasai tiha, ba ne’e fó apoiu, ba ne’e ho konviksaun ida, ba atu fó apoiu, ba atu ajuda,” Xanana afirma tan.

Iha planu forsa tarrefa konjunta ne’e ba fó apoiu povu Filipina ne’ebé enfrenta dezastre ne’e durante loron 20, maibé iha posibilidade bele aumenta fulan ida ka rua tan, karik bele too fulan tolu. Tanba ne’e ba hirak ne’ebé kole kuandu dehan moras ba deskansa, fila mai, seluk ba fali   hodi ba aprende nafatin too misaun ne’e hotu.

Iha fatin hanesan, Xefe Estadu Maiór Jenerál Forsa Armada (XEMGFA) Tenente Jenerál Domingos Raul Falur Rate Laek agradese ba Primeiru-Ministru Xanana Gusmão ne’ebé bele hiit aan mai iha Kuartel Jenerál F-FDTL  atu despede kontijente forsa tarrefa konjunta ne’ebé atu halo misaun nobre ba apoia umanitária iha Filipina.

“Ita boot sira nia prezensa sai nafatin sinál destinu  enkorajamentu, maske institisaun F-FDTL enfrenta, maibé ho ita boot nia prezensa bele motivu no enkoraza forsa tarrefa sira halo servisu ho tuir esperiénsia ita boot nian,” Falur Rate Laek hateten.

Tenente Jenerál Falur Rate Laek mós fó koñesementu Komandante  ne’ebé lidera kontijente forsa tarrefa konjunta ba misaun umanitária iha Filipina mak Koronél Graduadu Vitór Soares. Majór infantaria José da Costa  nu’udar Segundu Komandante ba forsa tarrefa konjunta ne’ebé atu halo misaun umanitária iha Filipina ho Majór David molok ne’e nu’udár  Ajudante Kampu Prezidente Repúblika José Ramos-Horta bainhira halo vizita Estadu ba Thalándia.

Reportajen ekipa Rafa.tl