Xanana Deklara TL Kansela Misaun Bons Ofísiu CPLP no Husu Deskulpa Ba Governu Guiné-Bissau

Primeiru-Ministru, Kay Rala Xanana Gusmão. Imajen/Rafa.tl

DILI-RAFA.tl-Primeiru-Ministru (PM), Kay Rala Xanana Gusmão, deklara Timor-Leste ofisialmente kansela Misaun Bons Ofísiu Komunidade País sira Lian Portugés (CPLP)  no  husu deskulpa ba Governu Guiné-Bissau.

Notísia Relevante: PR Horta Nomeia Pedro Klamar Fuik Nu’udar Enviadu Espesiál Ba Misaun Bons Ofísiu CPLP iha Guiné-Bissau

Primeiru-Ministru Kay Rala Xanana Gusmão hato’o deklarasaun ofisiál ne’e ba jornalista sira iha Salaun João Paulo II, Comoro, Díli, Segunda (16/02/2026), relasiona ho deklarasaun sira husi Governu Guiné-Bissau ne’ebé lamenta ho atuasaun Timor-Leste nian hanesan País maun-alin iha CPLP.

“Ha’u husu deskulpa ba Governu tranzisaun Guiné-Bissau, ha’u mós rona dehan katak kuitadu ha’u hanoin se, iha ne’e ha’u sempre dehan eroi luta ba rejisténsia nian ne’e ita nia povu, laiha eroi seluk, ne’ebé ha’u ne’e la’ós eroi ida, ha’u la defende aan, ha’u hakru’uk teb-tebes, maibé ho Prezidente Repúblika, ami deside tiha ona la haruka Ministru Defesa ba,” Primeiru-Ministru Kay Rala Xanana Gusmão hateten.

Xefe Governu subliña, ho situasaun ne’ebé Guiné-Bissau iha, Timor-Leste kansela reprezentante Governu Timor-Leste nian ba iha Guiné-Bissau atu halo mediasaun ba problema ne’ebé mosu liga ho golpe Estadu no interrupsaun eleitorál ne’ebé Guiné-Bissau enfrenta.

“Ita mak kansela, tanba sira dehan halo saida, imi la apóiu buat ida, imi mai fali ajuda ami, ha’u labele temi krize, buat ne’e, tanba lae ha’u ofende sira, tanba ha’u ne’e se los, ha’u ne’e la folin buat ida, mais laiha tanba CPLP ita kaer hela prinsípiu,” Xefe Governu esplika.

Antes ne’e, Prezidente Repúblika, liu hosi Dekretu Prezidensiál nú.º 13/2026, iha  loron 9 fulan-Fevereiru, nomeia Ministru Defeza, Kontra-Almirante Donaciano da Costa Gomes, nu’udar Enviadu Espesiál Prezidente Repúblika nian ba Misaun Bons Ofísiu Komunidade País sira Lian Portugés (CPLP-sigla  portuges) iha Guiné-Bissau, ne’ebé sei hala’o husi loron 17 to’o loron 21 fulan-Fevereiru 2026.

Desizaun ne’e halo hafoin Konferénsia Estraordinária I hosi Xefe Estadu no Governu CPLP nian, ne’ebé hala’o iha loron 16 fulan-Dezembru tinan 2025, iha ne’ebé Repúblika Demokrátiku Timor-Leste asumi Prezidénsia Pro Tempore (ho tempu determinadu) organizasaun ne’e to’o tinan 2027, hafoin Guiné-Bissau hetan suspensaun hosi atividades hotu-hotu iha CPLP.

Reportajen ekipa Rafa.tl