Xanana Deklara Intervensaun Ba Lotaria Grand Dragon Hanesan Xefe Governu

PM Xanana Gusmão. Imajen/Rafa.tl

DILI, RAFA.tl- Primeiru-Ministru (PM), Kay Rala Xanana Gusmão, konfirma katak nia intervensaun hodi orienta taka Grand Dragon Lotaria hanesan Xefe Governu no la’ós ba tanba motivu polítika.

Notísia Relevante: Grand Dragon Lotaria Dezmente Loke Jogu Online no Lamenta ho Buska-Apreensaun

‘’Polítika sim! Maibé, la’ós partidu, ha’u nu’udár Xefe Governu, hakilar bebeik kona-bá jogu online, buat sira ne’e hotu dehan ha’u maka autoriza bebeik, la’ós dala ida deit, lor-loron, informa tiha ba ne’ebá katak hasai ona rezolusaun ida hodi taka tiha, maibé haré ba ema sei joga, taka habosok, ema joga nafatin, hasai fali rezolusaun dehan se sira hatene ona taka tiha sira joga nafatin tenke hasai tiha,” Primeiru-Ministru Kay Rala Xanana Gusmão hateten hodi responde Rafa.tl iha Palásiu Prezidensiál, Sesta (05/12/2025).

Xefe Governu haktuir Lotaria Grand Dragon pratika hela asaun saida maka husi rezolusaun bandu, tanba dadus kompletu iha saida maka sira pratika ka fahe insetivu ida ne’e dadus kompletu.

‘’Dragon joga hela, dadus iha hotu, ida-ne’e hetan 50%,  ida-ne’ebá hetan 20%, ida-ne’e hetan 10%, iha hotu, hanesan ho Indonézia ho Brazil ho Europa ho ne’ebé tan, ne’e mak ha’u ba no antes ha’u ba Polísia ba iha tiha ona. Polísia maka hahú uluk buska no apreensaun,” Xefe Governu haktuir.

Xanana Gusmão argumenta katak iha Parlamentu Nasionál iha ámbitu debate proposta Orsamentu Jerál Estadu 2026 kuaze loron-loron, Deputadu sira hakilar maka’ás  to’o defama Governu kona-bá jogu online, tanba ne’e, haré balun kontinua pratika, di’ak liu taka kedas.

Reportajen ekipa Rafa.tl