Weasel F.C Halakon Lica Lica Lemorai FC ho Score 1-0

Ekipa Waesel F.C

Díli, 07 Juñu 2026 (RAFA.TL)-Ekipa estimadu Munisípiu Ermera,  Weasel F.C susesu rekolla pontus tolu hafoin halakon nia adversáriu Lica Lica Lemorai F.C ho score mihis 1-0 iha jogu kontinuasaun Liga Futeból Timor-Leste (LFTL) segunda divizaun grupu B.

Jogu ne’ebé hala’o iha Estádiu Munisipál Díli, Sábadu (06/06/2026), ekipa rua hatudu vontade boot atu domina jogu tuir ritmu idaidak nian, maske Lica-Lica Lemorai F.C tenta halo presaun no kria oportunidade oioin, maibé Weasel F.C mantein disiplina no hametin liña kotuk ho defeza ne’ebé forte.

Antes atu termina jogu priemeira parte tensi jogu sa’e lalais liután tanba ekipa rua  aumenta intensidade atu buka golu. Maske nune’e, liña defeza no guarda-rede husi ekipa rua servisu ho di’ak tebes, hodi halo oportunidade hotu-hotu la lori mudansa ba score to’o termina jogu priemeira parte mantein ho 0-0.

Kontinua ba jogu segunda parte, intensidade jogu sai manas liután, nune’e tama ba iha minutu 74 Weasel F.C konsege produs golu ida liu husi jogadór Benyamin Soares ne’ebé aproveita oportunidade másimu hodi muda score sai 1-0.

Hafoin golu ne’e, Lica-Lica Lemorai F.C tenta sai husi presaun no hasa’e liután intensidade jogu atu buka golu hodi halo empate, maibé defeza no guarda-rede Weasel F.C mantein solidu no organizadu hodi asegura jogu to’o  termina jogu segunda parte vitória ba Weasel F.C.

Hosi rezulatadu vitória ne’e hatuur ekipa Waesel FC iha Quartu klasifikasaun grupu (B) ho pontu haat hosi jogu tolu, manan ida, empata ida no derrota ida.

Ekipa Lica Lica Lemorai FC tun ba iha pozisaun datoluk ho pontus haat hosi jogu tolu, manan ida, empata ida no derrota ida.

Jornalista: Davilio Valdamir/Editór: Vito Salvadór