Vitória Dramátiku Santa Cruz F.C Lori Aitana F.C Tun Ba Segunda Divizaun Époka 2027

Santa Cruz F.C

Díli, 18 Jullu 2026 (RAFA.TL)- Ekipa Santa Cruz F.C susesu rekolla pontu másimu hafoin konkista vitória dramátika hasoru adversáriu Aitana F.C ho score 2-1.

Rezultadu husi jogu ne’ebé hala’o iha Estádiu Munisipál Díli, Sábadu-ne’e, obriga Aitana F.C degrada ba Segunda Divizaun iha époka tinan oin ka 2027.

Iha inisiu jogu, ekipa rua hatudu espiritu luta ne’ebé aas no jogu ne’e hanesan finál ba ekipa Aitana F.C atu sai husi zona degradasaun.  Nune’e  Santa Cruz F.C, ne’ebé okupa iha Segundu klasifikasaun no sei iha oportunidade atu disputa títulu kampeaun lansa ataka ho jogu ne’ebé as no lais.

Aitana F.C hatudu ritmu  jogu ne’ebé diak liu husi lansa kontra-atake lalais husi liña kotuk to’o oin. Hafoin simu bola kruza hosi nia kompatriota iha parte karuk, Antoninho Marques aproveita oportunidade ne’e  hodi marka golu dahuluk ba Aitana F.C no muda score ba 1-0.

Aitana F.C esforsu atu mantein nia vantajen, enkuantu Santa Cruz F.C kontinua halo presaun hodi buka golu balansu, maibé laiha tan golu ruma ne’ebé akontese to’o jogu primeira parte termina mantein ho score 1-0.

Tama ba segunda parte, Santa Cruz F.C, sofre uluk golu ida iha priemeira parte mai ho espíritu foun no determinasaun aas. Ekipa ne’e hatudu joga ne’ebé agresivu no domina lansa kontra atake lalais no kontinua fó presaun boot ba liña defeza adversáriu.

Tama ba iha minutu 57, presaun forte husi Santa Cruz F.C ikusmai obriga defeza Aitana F.C komete erru ida iha área penalti. Arbitru ne’ebé haré klaru akontesimentu ne’e la tarde atu foti desizaun, no hatudu kedas pontu mutin no fó penalti ba Santa Cruz F.C.

Vincent Noerty, ne’ebé sai ezekutór penalti ne’e hatudu kalma no konfiansa aas. Ho remate ida ne’ebé forte ho nune’e guarda rede Aitana F.C la konsege antisipa  ho nune’e score Sai balansu 1-1.

Golu importante ne’e la’ós de’it fó balansu ba rezultadu, maibé mós hatama fali konfiansa no enerjia ba Santa Cruz F.C atu kontinua fó presaun ba Aitana F.C.

Tama ba iha minutu 77, Santa Cruz F.C ikusmai konsege muda situasaun. Liuhosi jogada ne’ebé organiza ho di’ak, Zenio Broclim hatudu nia kapasidade iha grande área no konsege remata ho susesu, hodi fura rede Aitana F.C hodi lidera hikas ho score 2-1.

Ho score refere jogu sai manas liu tan ba ekipa maibé la iha tan golu ruma maka akontese to’o termina jogu segunda parte vitoria ba Santa Cruz F.C.

Husi rezultadu vitória ida-ne’e, Santa Cruz F.C tuur metin iha pozisaun daruak klasifikasaun provizóriu Liga Timorense Primeira Divizaun ho total pontu 20 husi jogu ualu ne’ebé hala’o ona, iha ne’ebé manan neen no empate rua  no seidauk sofre derota.

Iha sorin seluk, Aitana F.C nafatin hela iha pozisaun da-sia tabela klasifikasaun. Maski sei iha hela jogu ida atu hala’o, situasaun ekipa ne’e la di’ak tanba pontu ne’ebé iha agora la sufisiente atu sai husi zona degradasaun, no konfirmadu ona degrada ba Segunda Divizaun iha époka 2027.

Jornalista: Davilio Valdamir/Editór: Vito Salvadór