Vabio Canavaro Hetan Kontrata Joga iha Klubu Kamen Podbablje Husi Kroasia

Vabio Canavaro

Díli, 26 Setembru 2026 (RAFA) — Wonderkid Timor-Leste, Vabio Canavaro hetan kontratu husi klubu profisionál ida husi Kroasia NK Kamen Podbablje  hodi fó  oportunidade atu dezenvolve nia karreira iha futeból internasionál.

Sekretáriu Jerál AD SLB Laulara, Domingos Cairo, orgullu ho progresu Vabio Canavaro, no konsidera esforsu no investimentu ba talentu foin-sa’e sira lori rezultadu dia’k. Tanba, klubu ne’ebe Vabio Canavaro hamutuk ho SLB kleur  dezde nia sei juniór  to’o hetan fatin seniór.

“Hanesan Timoroan, ita orgullu tanba jogadór ne’e hetan prestasaun ida di’ak ba joga iha li’ur, hodi manan esperiensia,” Domingos Cairo afirma.

Sekretáriu Jerál AD SLB ne’e haktuir prezensa Vabio Canavaro ba klubu foun iha Kroasia bele eleva kapasidade individual no aumenta nia esperiénsia kompetisaun, hodi responde ba preokupasaun kona-ba dezenvolvimentu jogador lokal inklui prepara futuru kontribuisaun Seleksaun Nasional Timor-Leste.

Nia hatutan, jogador Timoroan sira ne’ebé atua iha diáspora tenke tau aas dignidade nasaun nian, hodi hatudu identidade, disiplina no komportamentu diak iha nivel internasional.

Nia mós hato’o mensajen ba sira ne’ebe agora joga  iha diaspora tenke tau sira nia aan,  hanesan Timoroan atu nune’e motiva fali sira nia alin ne’e mai tenke hatudu duni katak  Timoroan  reprezenta Timor iha klubu ne’ebe sira joga  iha li’ur.

“Ita tenke hatudu disilipa no tau aan hanesan ema ne’ebe iha lisan, atu ne’e nasaun ne’ebé haré sira joga ne’e komesa loke hanoin katak Timor iha jogadór di’ak,” Sekretáriu Jerál AD SLB ne’e hateten.

Antes ne’e Vabio Canavaro hetan oportunidade dahuluk husi klubu Singapura Tanjong Pagar United. Ho durasan fulan-tolu hahú husi fulan-Fevereiru to’o Maiu 2026, molok hetan fiar husi klubu Kroasia NK Kamen Podbablje.

Jornalista : Marito da Costa