Udan-Boot Hamosu Inundasaun iha Postu Fronteira Batugade ho Motain

Inundasaun iha Postu Fronteira Batugade, Postu Administrativu Balibo, Munisípiu Bobonaro, Domingu (08/03/2026). Imajen/Rafa.tl

DILI, RAFA.tl—Udan ho intensidade forte ne’ebé akontese iha Domingu madrugada (08/03/2026), hale’u tuku 03:00 to’o tuku 05:00 dadeer Oras Timor-Leste, hamosu inundasuan iha postu fronteira terrestre Batugade, Timor-Leste no Postu Fronteira Motain-Indonézia.

Informasaun ne’ebé RAFA.tl rekolla  husi fontes sira servisu iha Postu Fronteira Motain-Indonézia ho Postu Fronteira Batugade, Postu Administrativu Balibo, Munisípiu Bobonaro, haktuir katak, udan ho intensidade fote iha madrugada ne’e, halo mota boot no  lori fatuk, rai-henek  no ai-hun boot sira mai taka metin tiha ponte okos iha kedas  liña amarela fonteira terrestre Timor-Leste ho Indonézia nian, nune’e halo ponte okos nakun ho sedimentasaun no ai-hun sira hodi rezulta bee mota sulin sai ba estrada laran.

Udan-been kahor taho-dodook ho livre nalihun tuir estrada laran no naresin hodi toma  to’o arredór postu fronteira nian nasaun viziñu rua ne’e nian, inklui bee-merak nalihun tama to’o fatin servisu atendimentu públiku ba  sidadaun sira  ne’ebé trata dokumentu iha Servisu Migrasaun nian atu halo viajen  tama-sai fronteira Motain ho Batugade.

Ho inundasuan ne’e, autoridade iha postu fronteira rua; Motain ho Batugade, deside labele halo atendimentu pùbliku, hanesan baibain iha parte dadeer, tuku 09:00 to’o tuku 13:00 meiudia, tanba autoridade sira hamutuk ho ekipa protesaun sivíl no korpu Bombeiru Munisípiu Bobonaro halo limpeza hodi hamoos fatin atendimentu públiku, inklui arredór postu fronteira nian ne’ebé nakonu ho bee no taho-dodook.

Tuir observasaun kontribuidór Rafa.tl ne’ebé akompañia direta ekipa protesaun sivíl ho korpu Bombeiru, funsionáriu  sivíl no militár sira ne’ebé destakadu iha postu fronteira rua; Batugade no Motain, hatudu katak hahú husi tuku 07:00 dadeer, sira komesa hamoos arredór servisu postu fronteira nian, no hasai, fatuk, rai-henek ho ai-hun boot sira ne’ebé   taka-metin iha ponte okos hodi loke fali bee halai tuir nia dalan.

Hale’u tuku 10:00 dadeer ne’e, Sekretáriu Estadu Protesaun Sivíl, Domingos Mariano Reis, akompañia husi ekipa Autoridade Protesaun Sivíl (APC) to’o kedas iha Postu Fronteira Batugade hodi haree direta inundasaun ne’ebé afeta maka’ás  ba movimentu no servisu vitál  sira iha Postu Fronteira Batugade, Postu Administrativu Balibo, Munisípiu Bobonaro.

Ho inundasan ne’e, autoridade sira postu fronteira Motain ho Batugade, foin bele halo fali atendimentu ba sidadaun sira ne’ebé hakuur fronteira terrestre ba-mai Kupang-Díli ka Díli-Kupang iha parte loraik, hahú tuku 14:00 to’o tuku 18:00 lokraik.

“Inundasaun ne’e obriga servisu hotu atendimentu iha postu fronteira Batugade, Timor-Leste ho Motain, Indonézia nian,  la bele halo atendimentu hanesan baibain. Nune’e, parte autoridade sira la halo atendimentu iha parte dadeer maibe muda fali atendimentu ba iha parte meiudia to’o loraik, husi tuku 14:00 to’o tuku 18:00 Otl,” fontes autoridade ne’ebé kolokadu iha postu fronteira Batugade haktuir.

Mézmu halo atendimentu ba públiku, maibé situasaun iha servisu atendimentu públiku no arredór postu fonteira rua ne’e seiduak iha ambiente ne’ebé moos hanesan baibain, tanba taho-dodook sei nakonu hela hafoin inundasaun.

Reportajen ekipa Rafa.tl