Tribunál Aplika Prizaun Preventiva Ba JEXP ho JMS Ne’ebé Na’ok Motór iha Merkadu Manleuana

Arguidu na'in-rua ne’ebé alegadu na’ok motór iha Merkadu Manleuana. Imajen/Rafa.tl

DILI, RAFA.tl – Tribunál Judisiál Primeira Instánsia Díli (TJPID), liu husi julgamentu primeira interogatória deside aplika medida koasaun prizaun preventiva ba arguidu ho inisiál JEXP ho arguidu ho inisiál JMS ne’ebé alegadu na’ok motór  iha Merkadu Manleuana.

Arguidu JEXP ho JMS nia Prosesu ho NUC : 0056/26. PNSIC, deskonfia komete iha  krime furtu-agravadu, nune’e Tribunál Judisiál Primeira Instánsia Díli hatún despaixu hodi aplika medida-koasaun Prizaun-Preventiva ba arguidu na’in-rua.

Prosesu primeiru interogatóriu ne’e prezide  husi Juíz Estajiáriu Cipriano  Fátima Sarmento, Ministériu Públiku reprezenta husi Prokuradór Napoleão Soares, arguidu na’in-rua hetan asisténsia legál husi  Defensór Públiku José da Silva.

Iha prosesu primeiru interogatóriu  ne’e, Ministériu Públiku, akuza arguidu ho krime furtu-agravadu iha artigu 252 tuir Kódigu Penál Timor-Leste.

Defensór Públiku José da Silva hatete, kona-bá arguidu na’in-rua ne’ebé mak PNTL detein iha loron 15 fulan-Fevereiru 2026, Tribunál aplika medida koasaun prizaun preventiva tanba arguidu na’in-rua na’ok motór.

“Arguidu  na’in-rua la’os foin primeira-vez halo, antes ne’e sira hetan ona asidente krime ona ba kazu hanesan na’ok motór, ba arguidu na’in rua iha ida mak antes komete krime, maibé sei iha minoridade, entaun liberta tiha, maibé nia komete tan, entaun nia idade atinji ona, nune’e Tribunál aplika medida koasaun prizaun preventiva ba arguidu na’in rua ne’e,” Defeza José da Silva  ba jornalista sira iha TJPID, Kinta  (19/02/2026).

José da Silva hatete, iha alegasaun ne’e parte  Ministériu Públiku mós  husu medida koasaun prizaun preventiva no defeza husu aprezentasaun periódika,  maibé Tribunál mantein ho pedidu  husi Ministériu Públiku nian.

Defensór Públiku ne’e subliña seidauk hatete, konkorda maibé simu tiha despaixu lai husi Tribunál mak mai haré no estuda lai, iha posibilidade bele rekursu  ka la rekursu, ne’e haré lai despaixu ne’e mai

Reportajen ekipa Rafa.tl