Tribunál Aplika Medida Prizaun Preventiva Ba CdA Ne’ebé Deskonfia Oho Veronica dos Santos

Tribunál Aplika Medida Prizaun Preventiva ba Arguidu CdA ne'ebé deskonfia oho nia ferik-oan iha área Praia dos Coqueiros, Sábadu (21/03/2026). Imajen/Rafa.tl

DÍLI, RAFA.tl–  Tribunál Judisiál Primeira Instánsia Díli (TJPID) liu husi desizaun ba prosesu primeiru interogatóriu, deside aplika medida Prizaun Preventiva (PP) ba arguidu ho inisiál CdA ne’ebé deskonfia oho nia ferik-oan Veronica Dos Santos, iha área Praia dos Coqueiros, Sábadu (21/03/2026).

Notísia Relevante: FOKUPERS Kondena Kazu Omisídiu Hasoru Veronica dos Santos no Husu Órgaun Judisiál Loke Prosesu Justu

Iha audénsia julgamentu ba kazu omisídiu ne’e, Ministériu Públiku promove arguidu ba iha Tribunál ho krime “Homesidu Simples”, Arma Brankas no Violénsia Doméstika ho Forma Ofensa Integridade Fizika Simples.

Iha despaixu ikus Juíz Turnu, Cipriano Sarmento, deside aplika Medida Prizaun Preventiva ba iha arguidu, tanba konsidera iha indisu forte ba krime ne’ebé promove ba arguidu.

Antes ne’e, iha alegasaun Ministériu Públiku ne’ebé reprezenta husi Prokuradora Bemvinda Do Rosário, husu Tribunál atu aplika Medida Prizaun Preventiva (PP) ba arguidu, tanba konsidera iha indisu forte ba krime ne’ebé promove mai iha Tribunal.

Parte defeza ne’ebé reprezenta husi Defensor Públiku Sérgio Dias Quintas, aseita ho pedidu Ministériu Públiku nian, atu aplika medida Prizaun Preventiva ba iha arguidu, atu asegura arguidu labele komete tan problema foun.

Prosesu ne’e audénsia primeira interegatóriu ne’e prezide husi Juíz Estajiáriu Cipriano  Sarmento,  Ministériu Públiku reprezenta husi Prokuradora Bemvinda Do Rosário no arguidu hetan asisténsia legál husi Defensor Públiku Sérgio Dias Quintas.

Tuir kronolojia katak, iha Sábadu,  21 fulan-Marsu 2026, hale’u  tuku 03:50 dadeer Otl, insidente  ida akontese iha tasi ibun área área Praia dos Coqueiros (besik loja Seara) entre katuas-oan no ferik-oan, no ikus mai deskonfia la’en oho fen.

Iha momentu ne’ebá, ekipa Forensik foti kedan mat- isin lori ba iha mortuáriu Hospitál Nasionál Guido Valadares (HNGV)  hodi halo autópsia, no arguidu detein kedas iha Komandu Munisípiu Díli, hodi submete mai iha prosesu Primeiru Interogatóriu.

Mate isin Veronica dos Santos parte Hospitál no Polísia entrega fila ona ba família hodi halo prosesu fúnebre tuir kultura.

Reportajen ekipa Rafa.tl