Tribunál Aplika Medida Aprezentasaun Periódika Ba Ajente-Xefe Polísia JLO Ne’ebé Tiru Nia Kaben

Ajente-Xefe Polísia JLO partiispa iha audénsia primeira interogatóriu iha TJPID, Tersa (14/10/2025). Imajen/Rafa.tl

DILI, RAFA.tl–Tribunál Judisiál Primeira Instánsia Dili (TJPID) liuhosi Juiza Jumiati Freitas, hatun despaisu hodi aplika medida koasaun aprezentasaun periódika ba arguido Ajente Xefe Polísia ho inisiál JLO ne’ebé tiru nia kaben iha área Ai-Mutin, Aldeia São José, Suku Bairru-Pité, Postu Administrativu Dom Aleixo, Munisípiu Dili, Domingu (12/10/2025).

Notísia Relevante: Komandu PNTL Munisípiu Dili Dezarma Membru Polísia Ne’ebé Tiru Nia Kaben

Prosesu interogatóriu dahuluk ba kazu ne’e iha sala julgamentu Prokuradór ne’ebé reprezenta husi Aderito Tilman promove arguidu ho krime ofensa integridade fízika grave ne’ebé previstu no punidu iha artigu 146 husi Kódigu Penál Timor-Leste.

Durante interogatóriu dahuluk iha TJPID, Tersa (14/10/2025), Ministériu Públiku (MP) iha nia alegasaun solisita ba Tribunál atu aplika justisa ne’ebé justu ba arguidu Ajente-Xefe Polísia JLO.

Defensór Públiku Estaquio Guterres husu aprezentasaun periódika ho razaun tanba arguidu nia hahalok ne’e lá’ós ho intensaun, maibé ho deskuidu.

Rona tiha parte hotu, Juiza Julmiati Freitas hasai despaisu hodi aplika media koasaun Aprezentasaun Periódika semana ida dala ida iha Komandu  Jerál PNTL.

Iha Primeiru interogatoriu dahuluk Defeza arguidu Estaquio Guterres hateten despaixu Tribunal Judisiál Primeira Instánsia Dili (TJPID), ba membru Polísia ne’e, sei iha hela prosesu, tanba ne’e presiza halo  investigasaun fali hodi rona vítima nu’udár  arguidu nia kaben.

Antes ne’e vítima  ho inisiál VCV hateten nia kondisaun agora dadaun ne’e isin-rua (gravida), no ain parte loos la diak no mós sei fó  impaktu ba nai saúde ho bebe iha knotak, tanba ida ne’e nia hakarak lori kazu ne’e ba oin.

“Kazu ne’e hau sei levanta ba oin atu bele hetan justisa” hateten VCV.

 Reportajen ekipa Rafa.tl