Treinadór Estranjeiru Yusup Mamen Maulana Garante Mushila F.C Kampiaun Liga Futsal Timor-Leste Époka 2026

Treinadór, Yusup Mamen Maulana.

Díli, 28 Agostu 2026 (RAFA)- Treinadór Estranjeiru ho nasionalidade Indonézia, Yusup Mamen Maulana garante lori ekipa Mushila F.C Kampiaun Liga Futsal Timor-Leste époka 2026.

Treinadór Mushila F.C, Yusup Mamen Maulana, hatete katak, além de rezultadu iha kampu, ekipa mos tau prioridade ba mantén relasaun no kondisaun ne’ebé di’ak entre jogadór, treinadór no Manajementu ekipa.

“Tarjetu prinsipál ami nian mak atu mantén kondisaun di´ak entre jogadór ho treinadór, jogadór ho manajement no treinadór ho manajementu. Naturalmente, targetu boot mak atu sai kampiaun Liga Futsal Timor-Leste 2026,” hatete treinadór prinsipál Mushila F.C Yusup Mamen Maulana ba RAFA iha Díli, Sesta-ne’e.

Treinadór ho nasionalidade Indonézia ne’e, konsidera preparasaun ekipa la’o di´ak, liuliu tanba adiamentu Liga fó tempu naruk liután ba ekipa atu prepara an ho diak.

“Mushila F.C iha mos jogadór balun ne’ebé reprezenta Timor-Leste no reforsa husi jogadór Indonézia. Kondisaun ne’e fó vantajen ba ekipa, maibé mos sai dezafiu iha prosesu harii kemistri entre jogadór sira,” tenik nia

Iha aspetu tékniku, treinadór konsidera jogadór sira kompriende ona sistema no maneira joga ne’ebé nia hakarak. Maibé, kemistri no kompriensaun entre jogadór sira sei sai prioridade atu hadi’a.

Ba preparasaun, Mushila F.C halo ona teste-jogu ka try-out no aplika aspetu oioin, inklui defesa, ataka, transisaun no bola paradu. Ekipa mos sei kontinua halo tryout no avaliasaun kada semana atu identifika no hadi’a frakeza sira molok kompetisaun hahú.

Treinadór Mushila F.C mos haree katak kompetisaun temporada ida-ne’e sei sai kompetitivu liután, tanba iha informasaun katak klube sira seluk mos reforça ekipa ho jogadór husi Indonézia. No Maski management ekipa tau targetu kampiaun, treinadór hatete katak nia la promete diretamente títulu, maibé hakarak atinji objetivu liuhusi prosesu no preparasaun ne’ebé diak.

Treinadór ne´e mos husu apoiu no orasaun husi adeptus Mushila F.C hotu, no promete katak nia hamutuk ho jogadór sira sei kontinua luta atu realiza targetu kampiaun Liga Futsal Timor-Leste 2026.

Jornalista: Davilio Valdamir