TLPDP ho AFP Apóiu Mobile CCTV Rua Ba PNTL

TLPDP ho AFP ho inisiativa apóiu CCTV rua ba PNTL, Tersa (09/12/2025). Imajen/Rafa.tl

DILI, RAFA.tl – Governu Austrália liu husi Timor-Leste Police Development Program (TLPDP) hamutuk ho Austrália Federal Police (AFP) ho inisiativa  apóiu ekipamentu teknologia Kamera  Closed Circuit Television (CCTV) rua hodi haforsa liután Polísia Nasionál Timor-Leste (PNTL) nia servisu ba kontrola krime  iha rai-laran, liu-liu iha kapitál Dili.

Ministru Interiór (MI), Francisco da Costa Guterres  ba jornalista sira, iha edifísiu Ministériu Interiór, Vila-verde, Tersa (09/12/2025),  hato’o agradese ba Timor-Leste Police Development Program (TLPDP) ho Austrália Federal Police (AFP) ne’ebé apóiu ona ekipamentu CCTV ba instituisaun PNTL atu fasilita Polísia nia servisu di’ak liután, asegura krime sira ne’ebé sempre akontese kada loron.

“Mobile CCTV ne’e sira apóiu ba iha Polísia Nasionál Timor-Leste ne’ebé mak bolu katak, cámera kontrolu CCTV ne’ebé maka “Movel” ne’ebé sira sei entrega CCTV sira iha Dili laran tomak, kuandu iha situasaun ruma akontese, sira bele la’o dau-dauk, bele kontrola hela,” Ministru Interiór Francisco da Costa Guterres esplika.

Governante ne’e afirma, ekipamentu  CCTV  ne’e, hodi fasilita Polísia nia servisu bainhira mosu krime ruma  uza hodi  detekta autór sira.

CCTV  rua ne’e, ida  sei instala iha sentru operasaun komandu PNTL no ida seluk bainhira halo patrullamentu ka operasaun sei lori tuir.

Komisáriu Adjuntu Krime Austrália Federal Police (AFP) Ian McCartney hatete, apóiu refere nu’udár kooperasaun bilaterál Austrália ho Timor-Leste, nune’e oinsá bele reforsa servisu autoridade seguransa nian.

“Ohin, ita mai hodi hatudu katak, AFP fó mós ekipamentu ne’ebé ohin ita haré hodi ajuda PNTL, para sira bele hala’o servisu sira ne’ebé di’ak liután, tanba ho mobile CCTV ne’e bele detekta lalais problema sira,” Ian McCartney hateten.

Reportajen ekipa Rafa.tl