TL-Japaun Kontínua Hametin Kooperasaun iha Área Turizmu, Agrikultura no Infraestrutura

Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay halo enkontru ho delegasaun parlamentár Japaun hodi ko'alia kooperasaun Timor-Leste ho Japaun ba futuru, Kinta (15/03/2026). Imajen/Rafa.tl

DILI, RAFA.tl– Timor-Leste ho Japaun kontínua hametin kooperasaun bilaterál iha área turizmu, agrikultura no infraestrutura hodi hasa’e kresimentu ekonómia Timor-Leste nian ba futuru.

Kompromisu forte entre Timor-Leste no Japaun ne’e, aprofunda liu husi enkontru bilaterál entre Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay akompaña husi Vise-Ministru Asuntu no Parlamentar, Aderito Hugo hamutuk ho Embaixadór Japaun mai Timor-Leste ho delegasaun deputadu Parlamentar Japaun na’in-haat iha Gabinete Vise-Primeiru-Ministru, Farol, Kinta (15/01/2026).

Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay, hateten Governu simu bainaka deputadu parlamentar husi Japaun hodi deskute área kooperasaun ne’ebé durante ne’e Japaun oferese ba Timor-Leste hodi tulun dezenvolvimentu seitór ekonómia país ne‘e nian ba oin.

“Ami simu bainaka mai husi Japaun, deputadu na’in-tolu no deputada na’in-ida mai ho embaixador Japaun nian atu reforsa tan ita-nia kooperasaun bilateral, liuliu iha área infraestrutura, agrikultura, nune’e mós iha turizmu ho área oin-oin liuliu entre parlamentar. Aproveita tempu ida-ne’e, hau hato’o ba sira kontribuisaun ne’ebe mak Japaun halo hahú tiha ona dezde tinan 1999 husi reuniaun iha Tokyo kontínua mai to’o ohin loron,” Francisco Kalbuadi Lay informa.

Primeiru Vise-Primeiru-Ministru  ne’e espera kooperasaun entre Timor-Leste ho Japaun metin liután no relasaun la’ós entre Governu de’it, maibé liuliu husi povu ba povu hanesan amigu ne’ebé koopera dezde tempu uluk to’o ohin loron.

Iha fatin hanesan Vise-Ministru Asuntu no Parlamentar, Aderito Hugo, hateten delegasaun parlamentar ida-ne’e mós halo enkontru ho Prezidente Parlamentu Nasionál hamutuk ho grupu amizade Parlamentu Timor-Leste ho Japaun iha relasaun amizade entre nasaun rua no povu rua forte tebes desde inisiu post referendu iha tinan 1999 to’o restaurasaun independénsia.

“Tempu IX Governu nian imi hotu hatene iha prezensa mós investimentu boot ida iha Laleia, sira bolu sipiat industria estaleiru ida ne’ebé oras ne’e iha koordenasaun intensivu ho ministériu relevante hanesan Ministériu Finansas, Justisa no mós Ministru Koordenador Asuntu Ekonomia no Ministru Turismu no Ambiente, oras ne’e, hein progresu finalizasaun.Ne’e faze ultimu husi espresaun bilateral entre nasaun rua nian,”  Vise-Ministru Aderito Hugo informa.

Governante ne’e haktuir vizita delegasaun deputadu parlamentar Japaun iha Timor-Leste atu reforsa tan povu ho estadu Japaun nia amizade no relasaun bilaterál ho Timor-Leste ne’ebé tinan ba tinan forsa ba bei-beik.

Reportajen ekipa Rafa.tl