Tipal Realiza Espozisaun Kona-bá Istória Feto Sira Ne’ebé Lakon Oan

Tipal realiza espozisaun ida atu hatudu esperiénsia moris husi inan-feton sira ne’ebé sofre kona-bá lakon oan. Imajen/Rafa.tl

DÍLI, RAFA.tl– Galeria arte Tipal, Kinta (12/03/2026), iha Palapasu, Díli, realiza espozisaun ida atu hatudu esperiénsia moris husi inan-feton sira ne’ebé sofre kona-bá lakon oan.

Atividade ne’e realiza ho objetivu atu fó espasu ba sira hodi espresa sira-nia sentimentu no esperiénsia moris depois enfrenta situasaun susar ne’e.

Organizadóra Rosa Cardoso, esplika  espozisaun ne’e hatudu fotografia, istória no testemuña husi inan-feton sira ne’ebé lakon oan tanba moras, asidente ka problema seluk.

Espozisaun ne’e mós hakarak hasa’e konsiénsia públiku kona-bá dezafiu sira ne’ebé família sira enfrenta hafoin lakon sira-nia  oan.

“Espozisaun  ne’e ita introdús mós iha sosiál mídia, karta ka brosura ne’ebé mak ita esplla atu  maluk sira lee,” Rosa Cardoso informa.

Rosa Cardoso hateten, dala-barak inan-feto sira ne’ebé infrenta  problema lakon oan, persiza komunidade sira atu fo apoiu motiva fila fali inan feto sira ne’ebe hasoru situasaun ne’e.

Espozisaun ida ne’e uza naran ida lakon oan ka oan lakon tanba la satisfas ho liafuan ne’ebé eziste ka bain-bain uza abortu, tanba hanesan bain-bain maluk sira rona, haré espreza direita bainhira ko’alia kona-bá abortu dalabarak iha sosiedade fó kulpa ho estigma ba feto sira. Ezemplu hanesan feto mak menus kuida ninia oan.

Espoziasaun ida-ne’e atu halo advokasia ba inan-feto sira ne’ebé hetan sofremenetu ba situasaun ida-ne’e, persiza apoiu hodi motiva sira.

“Ita hatene ida-ne’e, buat ida lakon oan la’ós feto hotu nia kulpa, maibé dalabarak estigma sira ne’e hakanek feto, depois fó impaktu  psikolojika ba iha feto sira, ho ida-ne’e mak ami hakarak iha inisia halo espozisaun ida-ne’e,” Rosa Cardoso tenik.

Espozisaun ida-ne’e, la’ós de’it hakarak halo advokasia no ko’alia oinsá atu redus estigma sira ne’e, maibé ho sofrementu  ne’e, aproveita  tempu sira hanesan ne’e, persiza ko’alia ka konta sai ba maluk sira seluk, nune’e bele fó espasu akalma an.

Reportajen Ekipa Rafa.tl