Timor-Leste Seidauk Iha Pro Diploma Atu Lidera Selesaun Nasionál

Diretor Asosiasaun Treinadór Timor-Leste, Gaspar Quintão

Díli, 31 Jullu 2026 (RAFA.TL)–Maske Timor-Leste agora iha treinadór hamutuk na’in-447 ne’ebé kaer lisensa husi nivel D to’o A, maibé to’o agora seidauk iha ida ne’ebé hetan Pro Diploma, ka lisensa aas liu ne’ebé normalmente presiza atu lidera selesaun nasionál iha nivel profisionál.

Diretor Asosiasaun Treinadór Timor-Leste, Gaspar Quintão, hateten atualmente Timor-Leste iha treinadór hamutuk na’in-447 ne’ebé kaer lisensa nivel D to’o  nivel A.

Treinadór na’in-79 iha lisensa C, na’in- 49 iha lisensa B, no na’in-13 mak kaer lisensa A no iha mós treinadór feto na’in-26 ne’ebé hetan lisensa C.

Gaspar Quintão ba RAFA.TL iha Federasaun Futeból Timor-Leste (FFTL), Sesta-ne’e,  esplika katak, tuir padraun lisensiamentu treinadór, ekipa selesaun nasionál husi nivel Sub-22 to’o ekipa seniór obrigatoriamente tenke lidera husi treinadór ne’ebé kaer lisensa Pro. Enkuantu treinadór ho lisensa A de’it permite atu treina ekipa husi nivel Sub-20 ba kraik.

“Ba selesaun nasionál hahú husi sub-22 to’o seniór, obrigatóriu tenke pro lisensa, ba lisensa A bele kaer de’it sub-20 mai kraik, maibé sub-22 to’o seniór obrigatoriu tenke pro lisensa,  mas agora dadauk iha Timor-Leste  seidauk iha treinadór lisensa pro diploma,” Gaspar Quintão hateten.

Nia hatutan, atu bele tuir kursu no hetan lisensa Pro, treinadór ida tenke iha uluk ona lisensa A. Maibé, kustu atu tuir programa lisensa Pro konsidera aas tebes, ne’ebé sai hanesan dezafiu boot ba maioria treinadór sira iha Timor-Leste ne’ebé hakarak kontinua hasa’e sira-nia kualifikasaun ba nivel Pro Diploma.

Nia esplika katak finansiamentu ba prosesu hetan lisensa Pro depende uluk husi kapasidade finanseira treinadór rasik. Maibé, karik klubu hakarak fó apoiu ba nia treinadór atu tuir kursu no hetan lisensa Pro, ida-ne’e mós bele realiza.

Nia hatutan tan katak, ba treinadór sira ne’ebé iha rekursu finanseiru sufisiente atu tuir kursu lisensa Pro, Federasaun Futeból Timor-Leste (FFTL) prontu fó apoiu liuhosi karta deklarasaun, ho kondisaun katak treinadór refere rejistradu ofisialmente iha diresaun tékniku FFTL.

Jornalista: Davilio Valdamir