Timor-Leste Seidauk iha Kampu Futsal ho Padraun Internasionál

Kampu Futsal ne'ebé apropriadu no tuir padraun FIFA. Imajen/reprodusaun

Díli, 19 Agostu 2026 (RAFA)- Prezidente klubu Sara-lima F.C, Januário Freitas Ximenes, preokupa Timor-Leste seidauk iha kampu Futsal ho padraun internasionál tanba ne’e  Sara-lima F.C rekomenda ba Asosiasaun Futsal Timor-Leste (AFTL) atu servisu hamutuk ho Federasaun Futebol Timor-Leste (FFTL) hodi harii kampu futsal ne’ebé apropriadu ba Kompestisaun Liga Futsal Timor-Leste.

“Ita nia kampu futsal, kada tinan, ita sempre aluga ka utiliza kampu futsal F-FDTL ne’e mós sai obstákulu ba ita, tanba utiliza kampu ne’ebé  ho sumenti, ne’e risku ba jogador no ninia kualidade jogu,” Prezidente klubu Sara-lima F.C, Januário Freitas Ximenes, informa ba RAFA iha Díli, Tersa-ne’e.

Prezidente Klubu ne´e argumenta, maske Liga Futsal Timor-Leste dezenvolve di’ak ona, maibé infraestrutura kampu sei presiza hetan atensaun liután. Tanba uza kampu ho padraun ne’ebé seidauk to’o nivel internasionál bele sai obstakulu ba  dezenvolvimentu kompetisaun.

Kapu Futsal tuir Padraun FIFA

 FIFA, órgaun mundiál futeból nian, estabelese dimensaun sira kampu futsal internasionál nian ba jogu sira ho naruk entre metru 38-42 no  kampu nia luan entre metru 18-23. Dimensaun sira-ne’e implementa atu asegura jogu ne’ebé la’o ho di’ak no kompetitivu iha nivel aas liu.

Liña baliza sira kampu nian, hanesan liña laterál sira no liña baliza nian, tenke ho luan 8 cm. Aleinde ne’e, iha sírkulu sentru ida ho raiu metru 3 iha sentru kampu nian, ne’ebé uza hodi hahú jogu ka hahú fali jogu hafoin bola sai hosi baliza.

Ba jogu nasionál no internasionál sira, medida baliza futsal nian konsistente nafatin: aas metru 2 no luan metru 3. Ai-riin baliza no trave tenke mutin no  nia mahar labele liu 8 cm.

Materiál Kampu Futsal nian

Kampu futsal bele halo hosi materiál oioin, ne’ebé afeta kualidade jogu nian. Materiál komún balu inklui borraxa ho revestimentu vinil, ne’ebé fornese superfísie ne’ebé mós no hanesan.

Aleinde ne’e, du’ut sintétiku dala barak uza tanba ida-ne’e fornese superfísie ne’ebé mamar, enkuantu simentu oferese superfísie ne’ebé toos no glide. Materiál sira seluk ne’ebé uza inklui parquet ka ai, ne’ebé maka moos no konfortavel atu halimar.

Materiál sira seluk, hanesan taraflex, ne’ebé halo hosi polímeru, mós uza beibeik tanba nia superfísie ne’ebé moos no hanesan. Hili material ne’ebé loos maka krusiál tanba ida-ne’e sei afeta ritmu jogu no konfortu hosi jogador sira. Tanba ne’e, asegura katak materiál kampu nian hatán ba nesesidade  xave sira  atu apoia jogu futsal ida ho kualidade.

Aspetu Adisionál sira

Aleinde medida kampu no baliza sira, aspetu importante sira seluk iha futsal maka bola nia medida no durasaun jogu nian.

Bola futsal ki’ik liu duké bola futeból kampu boot nian, ho sirkunferénsia maizumenus 62-64 cm no todan entre grama 400-440.

Jogu futsal ida dura minutu 40, ne’ebé kompostu hosi parte rua ho minutu 20, ho deskansa minutu 15 entre parte sira.

Tanba ne’e, dimensaun sira hosi kampu futsal padraun nasionál no internasionál ida varia uitoan, partikularmente iha termu fleksibilidade iha kampu nia naruk no luan. Maibé, medida padraun ba golu sira no materiál sira kampu nian konsistente nafatin atu asegura jogu ne’ebé justu.

Jornalista: Davilio Valdamir