Timor-Leste Preparadu Kompete iha ASEAN U-17 Championship 2026

Selesaun Nasionál Sub-17 halo preparasaun atu enfrenta Indonézia iha ASEAN U17 Championship 2026. Imajen/FFTL

Díli, 09 Abril 2026 (RAFA.tl)- Ekipa Selesaun Nasionál Timor-Leste Sub-17 preparadu intermu tátika no mós fíziku atu kompete iha ASEAN U17 Championship 2026, ne’ebé sei realiza iha Indonézia.

Iha Kinta (09/04/2026), ekipa tékniku kompostu husi Treinadór no Federasaun Futeból Timor-Leste (FFTL) halo anúnsiu ba lista jogadór finál selesaun nasionál Sub-17 kompostu husi jogadór na’in-23, hanesan Baliza João Baptista (Santa Cruz F.C), Domingos Alfian Maia (Sentru Treinamentu Becora), Joel Novu Baptista (Asosiasaun Futeból Bobonaro).

Iha liña Defeza kompostu husi, Igninu Martins  Fátima Bras (DIT F.C), Jacob Salsina Maia (Assalam F.C), Florindo de Araujo Santa  (Santa Cruz F.C), Dramiziu Agostu Morreira (Emmanuel F.C), Jeremias Barreto (AS Marca), Savánio Lorenço Araújo (DIT F.C), Filomeno Magno da Silva (Nagardjo F.C), Reinaldo Junior Viegas Galucho (Karketu Díli F.C), Geovânio Fralegio Amaral (Karketu Díli F.C), Kevin da Silva Ximenes  (Santa Cruz F.C).

Médiu, Paul Amaral Bras (Nagardjo F.C), Kay Samuel de Castro Sitney (Olimpic F.C), Jerónimo Nono (Emanuel F.C), Jefri Mari (Coração F.C), Jermano Branco  da Silva (A.D S.L.B Laulara).

Avansadu, Tomas pawel Haidel (Pert United), Gaudénsio Luís de Jesus Lopez ( F.C Porto Taibessi), Manuel  Reinaldo Sarmento (Karketu Díli F.C), Helton Geovánio Gusmão da Conceição (Asosiasaun Futeból Oé-cusse), Jezeus Gabriel Von Lay (Santa Cruz F.C).

Assistente Treinadór Selesaun Nasionál Sub-17,  Manuel da Costa Soares, hatete durante ne’e ekipa halo ona preparasaun ho di’ak, liu-liu fíziku ba jogadór sira ho modelu tolu ne’ebe iha mak hanesan, Low Block,  Middle Block, inklui  pressing  hodi infrenta jogu sira ne’ebe  difísil.

“Ami haré kona-bá ami nia modelu ne’ebé ami prepara katak, ami orienta ona jogadór sira mosu situasaun hanesan ita-nia desizaun mak rona orientasaun treinadór husi liur no tenke implementa modelu ida-ne’e.  Ami koko análize  jogu antes iha ami nia “try out” dala rua no dala tolu ne’ebe ami halo, ami bele haré ona katak saida mak ami prepara atu antisipa, tanba ami hatene katak Indonézia ekipa ne’ebé forte demais iha presaun, tanba ne’e mak ami halo ona preparasaun,” Manuel da Costa Soares hateten.

Iha fatin hanesan, Diretór Servisu Selesaun Nasionál Federasaun Futebol Timor-Leste, João Maneco, hatete ekipa laiha alvu durante kompetisaun, maibé iha esperansa sei hatudu rezultadu ne’ebe di’ak durante kompetisaun.

Nia argumenta, kona-bá alvu FFTL laiha alvu fiksu ba ekipa ida ne’e, tanba primeiru, ekipa ida ne’e joven liu para atu tula alvu ba sira leten, tanba ekipa ida ne’e, ekipa ne’ebé mak tau esperansa atu sai futuru ba ekipa prinsipál.

“La signifika katak sira ba mós  atu partispa, sira tenke mai ho rezultadu ruma ne’ebé atu hatudu katak investimentu ne’e nia mudansa ne’e iha, atu nune’e, bele haré  iha kontestu individuál jogadór ida ne’ebé mak iha projesaun ba oin,” João Maneco esplika.

Tuir oráriu,  Selesaun Nasionál Timor-Leste Sub-17 sei aranka ba Indonézia iha Sesta, 10 Abríl 2026 no Timor-Leste tama iha Grupu A hamutuk ho uma na’in Indonézia, Vietnam no Malázia.

Jornalista: Marito da Costa/Editór: Vito Salvadór