Timor-Leste Hato’o Solidariedade Ba Austrália ho Tiruteiu iha Bondi Beach iha Sydney

Médiku evakua vítima ba ambulánsia hafoin insidente tiruteiu ida iha Bondi Beach iha Sydney iha loron 14 fulan-Dezembru tinan 2025. Imajen/Saeed KHAN/AFP)

DILI, RAFA.tl– Primeiru-Ministru Kay Rala Xanana hato’o solidariedade ba povu no Governu Austrália, relasiona akontesimentu tráziku ho tiruteiu iha Bondi Beach iha Sydney.

Iha komunikadu ofisiál ne’ebé Rafa.tl asesa husi Portal Governu, Segunda (15/12/2025) hatete, Timor-oan sira hakfodak no triste tebes ho tiruteiu iha Bondi Beach iha Sydney, ne’ebé ema barak lakon vida no hetan kanek.

Atake sira ne’e hamosu sofrimentu profunda. Governu Timor-Leste hato’o sentida kondolénsia ba família sira ne’ebé lakon ema ne’ebé sira hadomi.

“Ha’u nia simpatia ba sira hotu ne’ebé hetan kanek ka trauma, inklui labarik no família sira ne’ebé halibur besik selebrasaun Hanukkah. Ha’u mós espresa ha’u nia solidariedade ho komunidade Judeu iha Austrália no iha mundu tomak iha tempu susar ida ne’e,” Xanana hateten.

Timor-Leste hamrík firme hamutuk ho Governu no povu Austrália. Aktu violénsia xokante ne’e la’ós Austrália ne’ebé ita koñese no respeita. Austrália respeita valór nakloke ba ema hotu, toleránsia no respeitu ne’ebé Austrália reprezenta ba ita nia rejiaun.

Austrália nu’udar belun di’ak no parseiru Timor-Leste nian no Timoroan barak iha relasaun pesoál, edukasionál no komunitária ne’ebé kle’an ho Sydney no New South Wales. Iha momentu tristeza ida ne’e, ha’u kaer metin povu Austrália iha ha’u nia hanoin no orasaun sira.

“Ha’u elojia resposta rápidu husi autoridade Australianu sira ne’ebé atua ho korajen hodi proteje públiku no salva vida. Ha’u hatene katak australianu sira sei hamutuk hasoru trajédia ida ne’e no forsa husi sira nia valór, reziliénsia no espíritu komunitáriu sei orienta intervensaun sira iha loron hirak tuir mai.” Primeiru-Ministru Kay Rala Xanana Gusmão hatete iha komunikadu ofisiál ne’e.

Timor-Leste hamrík hamutuk ho Austrália hodi defende dignidade umana no liberdade fiar nian. Hasoru violénsia ne’ebé laiha sentidu hanesan ne’e, ha’u reafirma ami nia kompromisu hamutuk ba komunidade sira ne’ebé seguru, nakloke no respeitu ba ema hotu.

Iha notísia ne’ebé Rafa.tl asesa husi Ajensia Notisioza Indonésia, Antara news, Segunda ne’e, Primeiru-Ministru Austrália, Anthony Albanese deskreve insidente iha Bondi hanesan xokante no preokupante tebes no hato’o nia kondolénsia ba vítima sira no sira nia família.

Nia hatutan tan katak governu federál servisu besik ho Polísia Estadu Nova Gales Súl (NSW) no sei fornese atualizasaun sira seluk bainhira informasaun adisionál kona-bá insidente ne’e sai disponível.

To’o notísia ne’e publika, Korporasaun Radiodifuzaun Austrália nian (ABC Austrália), relata katak númeru vítima mortál hafoin tiruteiu iha Bondi Beach, Sydney, Austrália sa’e ba pelumenus ema na’in 16 no na’in 40 seluk sei hetan hela tratamentu iha uma no ospitál sira.

Reportajen ekip Rafa.tl