Timor-Leste Hahú Halo Preparasaun Simu Primeiru-Ministru Anthony Albanese

PM Xanana kaer-liman no konversa ho PM Anthony Albanese. Imajen/Média-GPM

DILI, RAFA.tl—Estadu Timor-Leste hahú halo preparasaun simu vizita Primeiru-Ministru Austrália, Anthony Albanese, ne’ebé tuir ajenda sei to’o iha Timor-Leste iha loron, 28 fulan-Janeiru ne’e.

“Ha’u ho Prezidente Repúblika, ko’alia uitoan kona-bá preparasaun vizita Primeiru-Ministru Anthony Albanese  nian iha Timor-Leste. Prezidente Repúblika mós sei koordena nafatin atu simu hanusa, iha ne’ebé,  oinusá, buat sira ne’e hotu importante ba ita. Ita sei simu Primeiru-Ministru Australianu,” Primeiru-Ministru Kay Rala Xanana Gusmão informa ba jornalista sira iha hafoin enkontru semanál ho Prezidente Repúblika, José Ramos-Horta iha Palásiu Prezidensiál, Kinta (08/01/2026).

Iha sorumutuk ne’e, Xefe Governu ho Xefe Estadu hato’o mós apresiasaun ba povu tomak ne’ebé selebra Natal no tinan foun ho hakmatek no ksolok.

“Prezidente Repúblika orgullu ho maturidade povu nian, liu-liu juventude sira, tanba durante Natal no simu tinan foun 2026 la mosu problema boot ruma ne’ebé lori impaktu ba nasaun. Ha’u informa katak, situasaun jerál iha Timor kalma, maske mosu problema balun iha área rurál. Akontese mós iha Díli, maibé la’ós akontese bei-beik, tanba festeza balun hemu lanu to’o hasai liafuan la kona malu hodi mosu problema, maibé la’ós problema boot. Prezidente mós agradese ba populasaun tomak, dispozisaun hotu-hotu atu kria nafatin dame iha ita nia rain,” PM Xanana haktuir.

Enkontru semanál ba fulan-dahuluk iha tinan 2026  ne’e, Xefe Governu mós atualiza ba Prezidente Repúblika kona-bá serimónia taka Konta Jerál Estadu (KJE) iha kalan fahe rua; 31 fulan-Dezembru tinan 2025 iha Ministériu Finansas (MF) ne’ebé haré katak iha sasán balun la konsege ezekuta, nune’e Xefe Governu fó ona atensaun ba membru Governu sira, ba oin ne’e sai hanesan lisaun ka fatór ida hodi tau osan natón atu nune’e bele ezekuta ho kualidade.

Reportajen ekipa Rafa.tl