Tielemans Lori Béljika Hakat ba Jornada 16 Hafoin Halakon Senegal 3-2 iha Tempu Adisionál

Béljika vs Senegal. Imajen/FIFA

Díli 02 Jullu 2026 (RAFA.TL)- Ekipa selesaun nasionál Béljika avansa ho dramatiku ba Jornada 16 Kopa Mundiál 2026 hafoin manán ekipa Senegal ho score 3-2 iha tempu adisionál liu husi golu sira Tielemans nian.

Jogu Senegal ho Béljika ne’ebéhala’o iha Estádiu Seattle, Kinta (02/07/2026), jogadór sira Béljika  nian hatudu sira-nia superioridade no domina jogu ne’e iha inísiu.

Sira halo atake ba iha Senegal, maibé iha minutu balun deit Senegal kontinua halo balansu ba jogu no ekipa rua mantein ho ritmu ne’ebé iha.

Tama ba minutu 10 ba leten Senegal hahú hola inisiativa hodi domina jogu no lansa atake barak ba ekipa adversáriu. Senegal kontinua halo atake ne’ebé inisia hosi Sadio Mané, Habib Diarra konsege manán Thibaut Courtois hodi lansa golu ida no muda score ba1-0.

Béljika buka atu hatán liuhosi oportunidade sira ne’ebé kria hosi Kevin De Bruyne no Charles De Ketelaere, maibé defeza ne’ebé metin hosi Senegal garante katak eskoru 1-0 mantein to’o iha intervallu.

Iha segunda parte, treinadór Béljika Rudi Garcia halo mudansa ba tátika hodi hatama Romelu Lukaku no hasai avansadu De Ketelaere. Maibé, envezde halo empata, Béljika kontinua sofre tan golu ida iha minutu 51 liu husi golu jogadór Senegal Ismaïla Sarr liu husi atake ida ne’ebé maka’as hafoin kontrola pasajen ne’ebé loos iha área penalidade nia laran, hodi marka golu no muda score ba 2-0.

Ho golu rua ne´e, Béljika kontinua halo mudansa sira, inklui substitui De Bruyne hodi halo ajustamentu sira-ne’e ikus mai fó rezultadu iha faze ikus sira jogu nian.

Lukaku marka golu ida iha minutu 86 hodi hamihis score ba 1-2,  hafoin aproveita bola kruzamentu husi Thomas Meunier diretamente iha guarda rede Mory Diaw nia oin.

Liutiha minutu tolu, Tielemans marka golu empata ho kabesa iha kaixa penalti laran hafoin simu kruzamentu husi Leandro Trossard, hodi muda score ba empata 2-2. No ho rezultadu empata ne´e, ekipa rua tenke kontinua ba tempu adisionál.

Durante tempu adisionál, ekipa rua  luta atu kria oportunidade perigozu sira. Senegal ameasa liuhosi Mbaye, maibé nia esforsu sira sei falla.

Béljika besik atu marka golu manán nian iha minutu 118 bainhira Dodi Lukebakio nia suta kona poste.

Ho sekuénsia atake intensidade as, halo jogadór Senegal sira komete erru hodi hamonu jogadór Béljika, Tielemans iha área penalti nia laran.

Hafoin konsulta ho monitor VAR, árbitru Said Martinez hatudu ba pontu penalidade nian. Tielemans hakat ba oin hodi foti penalti ne´e no ezekuta ho perfeitu, hodi muda score ba 3-2.

Vitória ne’e halo Béljika hakat ba Jornada 16 Kopa Mundiál 2026, iha ne’ebé sira sei hasoru vensedór hosi jogu entre Estadus Unidus no Bósnia no Herzegovina.

Jornalista: David Gonçalves/Editór: Vito Salvadór