Teófilo Freitas, Primeiru Lugar Ba Kategória Para-Atletismu 10 Km Díli Internasionál Maratona 2026

Atleta paralímpiku Timor-Leste, Teófilo Freitas.

Díli, 08 Agostu 2026 (RAFA) – Atleta paralímpiku Timor-Leste, Teófilo Freitas ho númeru dorsal 578, hatudu nia kapasidade no determinasaun liuhusi prestasaun di’ak iha Díli Internasionál Maratona 2026, hafoin sai primeiru lugar iha kategória para-atletismu ba korida 10 Kilómetru (10 Km).

Atleta Teófilo fó apresiasaun ba Prezidente Repúblika, Governu no Komisaun Organizadora ba eventu Díli Internasionál Maratona tanba fó oportunidade no inklui ema ho defisiénsia sira iha eventu internasionál, tinan ne’e.

“Agradese Nai Santisimatrindade ba grasa no kbiit tomak mai ha’u. Ha’u bele atinji eventu ida ne’e ho komisaun ne’ebe di’ak no susesu agradese mós ba parte Palásiu Prezidenasiál ne’ebé inklui ona ema ho difisiénsia iha Díli Internasionál Maratona ida ne’e agradese mós ba ami nia treinador ne’ebe mak la baruk dedika ona ami,” Teofilo Freitas  hatetenba jornalista sira iha Palásiu Prezidensiál, Díli, Sábadu-ne’e.

Teofilo hatete maske idade avansadu ona, maibé seidauk iha atleta potensial ne’ebe atu hadau pozisaun primeiru lugar  iha korida ho kategória  Kilómetru  10 ida ne’e.

Vitória ida-ne’e mós aumenta valor no vizibilidade ba para-atletismu iha Timor-Leste, no bele sai motivasaun ba komunidade ho defisiénsia atu kontinua envolve-an iha atividade desportiva.

Jornalista: Davilio Valdamir