Tenente Jenerál Falur Rate Laek husu Polísia Militár Tane Aas Disiplina no Profisionalizmu

Unidade Polísia Mlitár (PM) FALINTIL-Forsa Defeza Timor-Leste (F-FDTL). Imajen/Média F-FDTL

RAFA.tl– Xefe Estadu Maiór Jenerál Forsa Armada, Tenente Jenerál Domingos Raul Falur Rate Laek hatete, Unidade Polísia Militár (PM) tenke tane aas disiplina profisionalizmu hodi bele sai ezemplu ba militár sira seluk.

Tenente Jenerál Domingos Raul Falur Rate Laek hato’o deklarasaun ne’e iha aniversáriu Unidade Polísia Militár (PM) ba dala-XXI ne’ebé hala’o iha Kuartél Jerál Polísia Militár iha Kintal-Boot, Díli, Sábadu (17/01/2026).

“Liu husi asaun sira tenke hametin padraun sira aas kona-bá disiplina, prontidaun no kapasidade operasionál. Disiplina mak fundasaun ne’ebé desizivu hodi harí klima konfiansa, estabilidade no seguransa ne’ebé mak populasaun sira haré, ita nia populasaun hein komportamentu atuasaun hotu-hotu, no eselénsia ida ne’e inkorpora iha polísia militár ida, ne’e tenke inkorpora iha pesoa militár nia perfil, ne’ebé ita selebra iha ne’e inspiradu hosi ita nia padrueiru nia legadu, ita boot sira nia komandante ohin ha’u halo referénsia.” Hatete Tenente Jenerál Domingos Raul Falur Rate Laek.

Falur Rate Laek enkoraja Polísia Militár sira atu sai espellu ba membru forsa armada sira seluk, hodi servi povu ho nasaun ne’e ho di’ak.

Nia hatutan, saida mak ezize ba imi ida-idak mak tenke sai espellu ideal ida, Militár ida ne’ebé disiplinadu, edukadu no respeitadu. Profisionál ida ne’ebé franku no loiál ho sentidu misaun no dever ne’ebé aas, aumenta espíritu sakrifísiu ne’ebé boot tebes no vontade atu servi ho di’ak. Membru Polísia Militár sira nafatin halo servisu ho disiplina nune’e kria armonia ho povu.

“Ba parada sira ne’ebé forma iha ne’e, justu atu rekoñese publikamente ita boot sira nia esforsu, la’os servisu ne’ebé ita boot sira presta ona tenke konsidera no destinsaun kontinua sai ezemplu morál no disiplina ba ita nia forsa armada sira hotu, atu kontinua servi Timor-Leste ho legalidade no rigor,”  Falur Rate Laek haktuir.

Iha fatin hanesan Komandante Polísia Militár Tenente Koronél Graduadu, Mateus de Jesus, hatete, Unidade Polísia Militár hahú nia formasaun iha tinan 2005 ho efetivu, pelataun ida ne’ebé koñesidu ho naran Maubere um. Iha momentu ne’ebá unidade Polísia militár seidauk iha estatutu própriu.

Nia haktuir, Polísia Militár estabelese hahú Iha loron 8 fulan Novembru tinan 2006 bazeia ba  artigu 12 númeru 4 dekretu númeru 15/2006 polísia militár legalmente kria no integra iha FALINTIL Forsa Defeza Timor-Leste.

“Polísia Militár asume papél estratéjiku ida guardia disiplina legalidade no autoridade militár sempre tuir prinsípiu Konstituisaun lei no regulamentu ne’ebé vigór, tanba estatutu orgániku define klaramente katak atividade Polísia militár bazeia ba legalidade proporsionalidade respeitu ba dignidade umanu ho utilizasaun forsa hanesan últimu rekursu.” Hatete Tenente Koronél Graduadu, Mateus de Jesus.

Tenente Koronél Graduadu ne’e hatutan, Polísia Militár la’os  de’it responsável ba  prevensaun ba Militár sira no hapara  infrasaun disiplinár militár, maibé polísia militár iha kompeténsia atu garante instalasaun militár halo Investigasaun Kriminál  ba foru militár, apóiu operasaun Militár,  kolabora ho autoridade sivíl iha situasaun krize hodi halo servisu ida ne’e ho dignidade.

Nune’e Polísia Militár tenke iha Kódigu konsulta no disiplina  ne’ebé aas liu no tenke sai hanesan ezemplu ba militár hotu-hotu ba forsa defeza Timor-Leste ne’e mak responsabilidade morál ne’ebé labele ita haluhan.

Polísia militár iha tinan 2025 ne’e  hala’o servisu ho progresu signifikativu maske hasoru dezafiu barak ho dedikasaun disiplina ho espíritu do corpo husi membru sira hotu konsegue kumpre maioria tarefa sira ne’ebé atribui mai Unidade Polísia Militár.

Dadauk ne’e, membru  efetivu husi polísia militár hamutuk  membru 203  ho númeru ne’e  konsidera limitadu tebes ba tarefa ne’ebé unidade Polísia militár tenke hala’o. Tan ne’e presiza rekrutamentu foun  iha nível soldadu hodi responde tarefa sira ne’ebé sei mai iha futuru oin mai.

Tenente Koronél Graduadu Mateus de Jesus kongratula no enkoraja  membru unidade Polísia militár sira hotu no husu atu nafatin fiar malu iha futuru servisu hamutuk ho ida ne’e sai nafatin unidade ida ne’ebé forti no fiel ba Konstitusaun no lei no tuir estatutu militár ne’ebé mak iha.

Reportajen ekipa Rafa.tl