Tasa Rotativa Avó Nana, Oportunidade Hasa’e Prátika Joven Sira iha Futeból

PM Xanana Gusmão halo abertura ba jogu Tasa Rotativa Avó Nana iha Estádiu Munisipál Díli, Kinta 27 Agostu 2026.

Díli, 27 Agostu 2026 (RAFA) – Primeiru-Ministru (PM) Kay Rala Xanana Gusmão konsidera Tasa Rotativa Avó Nana 2026 nu’udar oportunidade importante ida hodi hasa’e prátika, esperiénsia no kapasidade joven sira iha mundu futeból.

“Agradese tebes ba patrosinadór sira no Prezidente Komisaun ne’ebé promove eventu ida ne’e, tanba liuhosi desportu bele fó oportunidade ba joven sira hodi hasa’e sira-nia prátika,” hatete Primeiru-Ministru Xanana Gusmão iha nia diskursu durante abertura jogu  Tasa Rotativa Avó Nana 2026, iha Estadiu Munisipál Díli, Kinta-ne’e.

Xanana Gusmão mós husu deskulpa tanba nia labele partisipa iha jogu abertura to’o remata, tanba iha asuntu importante seluk ne’ebé presiza nia atensaun.

“Ha’u husu deskulpa, lae ne’e ha’u tur iha ne’e to’o aban mós laiha buat ida, tanba servisu, ne’ebe ha’u husu deskulpa,” Xanana hateten.

Iha okaziaun ne’e, Primeiru-Ministru Xanana Gusmão mós hato’o nia agradeseimentu ba Prezidente Komisaun no patrosinadór sira ne’ebé, ho laran luak, fó apoiu ba realizasaun Tasa Rotativa Avó Nana 2026.

Tasa rotativa Avó Nana 2026, kompete husi klubu futeból 25, mak hanesan  Jomar FC, Naimeco FC, Reley Laleia FC, FC Warik Oan, Amigo FC, FC Aimo, Resoais Aulain D’One, Cavalho de Fronteira, Laisorulai CF, Ostiku FC, Bairo da Paz, Ermera City, FC Mulia, Vila Vista FC, Buradu FC, FC Sengol, Irapuha FC, F-FDTL FC, FC Fatunsah, Vila Atauro, AD Laivai, FC Zhavia, Fitun Ramelau, no PNTL.

Jornalista: Marito da Costa