Taça da Liga, Karketu Díli F.C Festa Golu Kontra Santa Cruz F.C ho Skor 8-1

Ekipa Karketu Díli FC. Imajen/Rafa.tl

DILI, RAFA.tl – Karketu Díli F.C susesu rekolla pontu neen (6) husi jogu rua no hatudu jogu ida atrativu hodi halo festa golu ba rede Santa Cruz F.C iha jogu ikus grupu D Taça da Liga FFTL.

Notísia Relevante: Karketu Díli F.C iha Ambisaun Hametin Títulu Kampiaun iha Taça da Liga

Iha jogu ikus entre Karketu Díli F.C no Santa Cruz F.C ne’ebé hala’o iha Estádiu Munisipál Díli, Domingu (08/02/2026),  harame tebes adeptu sira no fó orgullu ba jogadór sira tanba jogu ne’e asiste direta husi reprezentante Federasaun Internasionál Asosiasaun Futeból nian (FIFA, sigla inglés),  Konfederasaun Futeból Aziátiku (AFC) no Federasaun Futeból ASEAN (AFF).

Reoprezentan FIFA, AFC ho AFF iha Timor-Leste atu  partisipa iha kongresu Eletivu FFTL nian ba dala-XIII ne’ebé hala’o iha Ótel Palm Springs, Fatuhada, Domingu-ne’e.

Iha jogu hahú, Karketu Díli F.C ne’ebé mai ho kombinasaun jogadór selesaun nasionál no estranjeiru, ne’ebé sólidu iha kada liña, hatudu kedas sira nia superioridade hodi domina jogu.

Jogu foin la’o de’it minutu haat, Karketu Díli F.C marka uluk golu ida ba adversáriu Santa Cruz F.C liu husi jogadór Ola Olipiu hodi hatur skor 1-0.

Ekipa Santa Cruz mós hatudu jogu ida rápidu, maibé ekipa estimadu Santa Cruz F.C tenke sofre tan segundu golu iha minutu 30, hafoin jogadór Karketu Díli F.C, Alexandro Corsino marka golu.

Liu de’it minutu rua, jogadór Karketu Díli F.C Ola Olipiu aumenta tan golu datoluk hodi lori Karketu  Díli FC lidera skor 3-0 no Karketu Díli F.C kontinua aumenta golu liu husi jogadór Gayo hodi muda skor ba 4-0.

Tama ba segunda parte, Karketu Díli F.C kontinua domina jogu iha liña klaran no defeza rua husi parte karuk no los halo overlap hodi fó bola ba avansadu sira no jogadór Alexandre Corsino aumenta tan golu hodi muda skor ba 5-0.

Karketu Díli F.C sofre golu ida iha minutu 52 hafoin defeza halo falta iha grande área laran no jogadór Santa Cruz F.C, Brocklyn Guteres ne’ebé ezekuta penalidade ne’e susesu marka golu ida hodi hatur skor 5-1.

Santa Cruz F.C kontinua sofre, hafoin Karketu Díli F.C domina jogu hotu hodi hamate Santa Cruz F.C nia jogu no haré katak iha kada liña Karketu Díli F.C domina totál.

Molok segunda parte termina Karketu Díli F.C aumenta tan golu tolu (3) liu husi jogadór Alexandre Corsino hodi muda skor ba 8-1.

Treinador Santa Cruz F.C, Miguel Santos Soares hatete, rekoñese forsa husi ekipa  Karketu no simu derota ne’ebé iha, nune’e mós sei esforsu maka’as liután ba kompetisaun sira tuir mai.

“Karketu, ita hatene ekipa boot, maibé ohin sai lisaun di’ak ida mai ami, maibé ha’u hakarak hatete ba sira katak, ohin ami marka golu ida, loron ida ami sei marka tan golu,”  Miguel Santos Soares hateten.

Iha fatin hanesan, treinadór ekipa Karketu Díli F.C, Barnard Taye hatete, satisfeitu ho skor  ne’ebé iha  no sei halo preparasaun di’ak liu tan hodi hasoru Asalam FC iha meius finais.

“Jogu ida ne’e iha rezultadu ida ne’ebé di’ak ba ami ekipa. Ha’u sente ami sei hasoru Assalam iha meia-final iha Taça da Liga époka ne’e, ami sei preparadu liután, no ha’u hatete ba imi, kuandu ha’u observa sira joga, ami sei prepara téknikamente hodi hasoru sira. Ha’u sempre dehan katak, ami mai atu halo momentu inesquisível, ami mai atu defende, ami mai atu uza oportunidade ho di’ak hodi nune’e bele marka golu barak liu tan,” Bernard Taye hateten.

Tuir oráriu, iha jogu faze meia-finál,  ekipa Karketu Díli F.C sei kontra Assalam F.C, no ekipa rua sei joga iha Domingu, 15 fulan-Fevereiru ne’e, iha Estádiu Munisipál Díli, oras 18:00 Otl.

Reportajen ekipa Rafa.tl