Suspeitu Oho Xefe Aldeia Metir Miguel Correia dos Santos Tanba Laran-Moras

Polísia Munisípiu Liquiça kaptura suspeitu iha área Fahilebo-Liquiça. Imajen/Média PNTL

DILI, RAFA.tl – Suspeitu ho inisiál VAC ne’ebé oho  Xefe Aldeia Metir, Miguel Correia dos Santos, iha Postu Administrativu Bazartete, Munisípiu Liquiça, tanba laran-moras no deskonfia Xefe Suku nia alin halo amante ho suspeitu nia ferik-oan.

Porta-voz Komandu Jerál Polísia Nasionál Timor-Leste (PNTL), Superintendente Polísia, João Belo dos Reis, informa  ligadu ho kazu omesidiu ne’ebé akontese iha Sábadu (29/11/2025), hale’u tuku 06:30 dadér, iha área Dargeo, Aldeia Metir, Suku Fatumasi, Postu Administrativu Bazartete, Munisípiu Liquiça, ne’ebé suspeitu ho inisiál VAC, hodi baku mate Xefe Aldeia Miguel Correia dos Santos no mós  baku nia káben ho inisiál AdD to’o kanek grave no prezudika  bebé mate iha isin tanba deskonfia Xefe Aldeia Metir nia alin mane halo amante ho nia káben.

“Bainhira Polísia Eskuadra Bazartete simu informasaun katak, kazu omesidu suspeitu VAC baku mate vítima Xefe Aldeia Metir, no suspeitu sona kanek nia feen rasik, tanba deskonfia vítima Xefe Aldeia Metir nia alin mane iha relasaun domin ho suspeitu nia fen ho inisiál AdD  mak suspeitu halo asaun baku mate vítima Xefe Aldeia Metir no nia feen grávida kanek grave to’o rezulta baixa iha ICU HNGV hodi hetan tratamentu intensivu,” Superintendente Polísia João Belo ba jornalista iha Komandu Jerál PNTL, Dili, Segunda (01/12/2025).

Superintendente Polísia ne’e hatutan bainhira kazu ne’e mosu suspeitu halai ses husi fatin lokál krime, no ekipa  Komandu PNTL Munisípiu Liquiça kolabora ho komunidade sira hodi buka tuir suspeitu, ikus mai kaptura iha ai-laran área Fahilebo-Liquiça.

“Husi seksaun investigasaun kriminál halo kedas atuasaun imediatu, hodi inisia prosesu investigasaun kriminál. Bainhira akontese kazu ne’e suspeitu inisiál VAC halai husi fatin akontesimentu. Nune’e, Domingo (30/11/2025), iha oras tuku 13:30 otl, operasaun konjunta ne’ebé hala’o husi komandu Munisípiu Liquiça  hamutuk ho komunidade kaptura suspeitu iha baliza entre Suku Fahilebo no Fatumasi iha ai-laran fuik,” João Belo dos Reis relata.

Superintendente Polisia João Belo dos Reis hatutan, vítima AdD   mós kanek grave iha parte isin-lolon, ne’ebé ho kondisaun isin-rua todan, dadaun ne’e, halo hela tratamentu iha HNGV maibé rezulta labarik mate iha vítima nia kabun laran.

Komandu PNTL Munisípiu Liquiça rekolla ona informasaun husi  suspeitu VAC  hodi rejista ho Númeru Úniku Krime  01/04/2025. Aprezenta ba Ministériu Públiku  hodi remete ba tribunál hodi halo prosesu Primeiru Interogatóriu.

Reportajen ekipa Rafa.tl