Suísa Lidera Grupu B Kopa Mundiál 2026 Hafoin Manán Kanadá 2-1

Jogadór Suísa sira selebra golu. Imajen/Repro

Díli, 25 Juñu 2026 (RAFA.TL)- Selesaun Suísa lidera grupu B Kopa Mundiál 2026 hafoin halakon nia adversáriu Kanadá ho score 2-1 iha jogu ikus faze grupu nian iha Estádiu BC Place, Vancouver, Kuarta (24/06/2026).

Suisa asegura vitória ne´e liu husi golu sira Ruben Vargas no Johan Manzambi, enkuantu Kanadá konsege responde golu ida liuhosi Promise David.

Iha jogu, Suísa hala’o jogu atake ida desde inísiu, ameasa sedu liuhosi suta ida hosi Johan Manzambi, maski ida-ne’e hetan frustrasaun hosi guarda-rede kanadianu Maxime Crepeau.

Manzambi kria tan oportunidade ida ba Suisa, maibé defeza kanadianu konsege blokeia rebote ne’ebé nia tenta atu konverte.

Suísa domina atake iha primeira parte nian, no Kanadá koko atu mantein ritmu, maibé jogu ne’e la hetan golu too intervalu.

Iha segunda parte, Suísa hetan vantajen iha minutu 46 bainhira Ruben Vargas konverte pasajen husi Manzambi hodi muda ba score 1-0. Suisa duplika sira nia vantajen ba 2-0 iha minutu 57 liu husi golu Manzambi, ne’ebé kapitaliza hosi pasajen ida hosi Breel Embolo.

Ho atrazu ho golu rua, Kanadá tenta regresu no kria oportunidade ida liuhosi Jonathan David, maibé defeza Suisa nian konsege neutraliza ameasa. Kanadá ikusmai marka golu ida hodi hamihis score ba 1-2 iha minutu 76 hafoin kruzamentu ida hosi Nathan Saliba ne’ebé konverte ba golu hosi Promise David.

Tama ba tempu estra segunda parte, Kanadá tenta atu halo empata, maibé esforsu sira nafatin la muda score  ne´ebé iha no Suisa mantein ho vitória 2-1 hodi asegura sira nia hakat ba faze eliminasaun.

Ho vitória ida-ne’e tau Suisa iha primeira klasifikasaun finál Grupu B nian ho pontu hitu hosi jogu tolu, manan rua no empata ida hodi avansa ba Faze 32. Entretantu, Kanadá remata iha segundu klasifikasaun iha Grupu B ho pontu haat hosi jogu rua, hodi kualifika ba Jornada 32 hanesan vice-kampeaun hodi hakat liu Bósnia-Herzegovina ne’ebé hetan terseiru lugar ho diferensa golu.

Jornalista: David Gonçalves/Editòr: Vito Salvadór