SNI-PCIC Buska Fatin Ne’ebé Deskonfia Loke Jogu Online iha Otél Oe-Upu

PCIC halo identifikasaun ba traballadór estranjeiru sira ne'ebé deskonfia servisu ba atividade jogu online iha Otél Oe-Upu, Oé-Cusse, Segunda (25/08/2025). Imajen/Rafa.tl

OÉ-CUSSE, RAFA.tl—Ekipa konjunta kompostu husi Serbisu Nasionál Intelejénsia (SNI) ho Polísia Siéntifika Investigasaun Kriminál (PCIC, sigla portugés), Segunda (25/08/2025), hale’u  tuku 21:00 Oras Timor-Leste, halo buska no apreensaun iha Otél Oe-Upu ne’ebé deskonfia hala’o atividade jogu online.

Informasaun ne’ebé kontribuidór Rafa.tl rekolla iha Otél Oe-Upu, Rejiaun Administrativa Espesiál Oé-cusse Ambeno (RAEOA) katak to’o Tersa kalan (26/08/2025), autoridade sira SNI ho PCIC  kontínua halo buska, apreensaun no detesaun bá sidadaun lokál balun no sidadaun estránjeiru liu ema na’in-10 ho nasionalidade Indonézia, Malázia no Singapura tanba deskunfia envolve iha atividade jogu online ne’e rasik.

Ekipa SNI ho PCIC konsege halo apreensaun bá prova ka evidénsia balun, hanesan telefone  husi jestór no traballadór sira, ho mós  sistema aplikativu jogu online  nian.

Parte autoridade sira SNI ho PCIC kontínua identifika bá pesoál ka traballadór sira, tantu Timoroan  no estranjeiru  sira, ne’ebé deskonfia hola parte iha jogu online ne’e.

Informasaun ne’ebé iha mós katak sidadaun estranjeiru sira  balun viola vistu, tanba utiliza hela vistu turista, maibé hala’o servisu hanesan traballadór iha faitn jogu online ne’e.

Parte SNI ho PCIC deskunfia planu operasaun ne’e sobre sai tiha ona bá parte sira iha Otél Oe-Upu tanba ne’e bainhira ekipa konjunta to’o lokál operasaun, kuaze deteta materiál prinsipál sira ne’ebé fasilita jogu online, inklui parte jestór ho investór prinsipál sira la iha fatin ka sai tiha antes ona.

Bainhira ekipa konjunta halo hela identifikasaun bá pesoál sira sidadaun estranjeiru, derrepente de’it ahi elétrisidade mate no deskonfia traballadór sira iha laran mak orienta malu taka ahi hodi halo barulla iha momentu ne’e.  Maske nune’e, ekipa PCIC kontínua rekolla informasaun ba kada pesoál traballadór sira husi estranjeiru, no konsege identifika autór prinsipál ne’ebé taka ahi derrepenti ne’e.

Iha mós insidente balun ne’ebé parte PCIC uza forsa hodi halo intimidasaun tanba individuu balun la koopera no tenta sabotaze prosesu identifikasaun no investigasaun.

Informasaun seluk ne’ebé Rafa.tl rekolla mós katak prezensa ekipa konjunta SNI ho PCIC laiha koñesimentu bá Prezidente Autoridade Rejiaun Administrativu Oé-Cusse Ambeno (RAEOA) no halo buska iha tempu kalan no la aprezenta mandadu ruma husi Tribunál.

To’o tuku 01:30 kalan-boot, ekipa PCIC telefoni fali ba ekipa EDTL RAEOA, to’o kedas fatin oiperasaun (Otél Oe-Upu)  hodi loke fila-fali ahi elétrisidade no ekipa SNI ho PCIC kontínua asegura traballadór sira tantu timoroan no estranjeiru iha sala serbisu hodi hein aprezenta bá Ministériu Públiku.

Iha fulan-Jullu 2025, empreza Internasionál Seagull Resortvhusi Malázia, arrenda Otél Oé-Upu ba tinan-50 ho kustu arrenda nian millaun $9 atu loke jogu online iha Oé-Cusse.

Prezidente Autoridade RAEOA, Rogério Tiago Fátima Lobato tempu ne’ebá deklara katak jogu online ne’e Governu Sentrál mak sei hasia lisensa tanba ne’e parte RAEOA halo koordenasaun hos Vise Primeiru-Ministériu bá Asuntu Ekonómia, Ministru Turizmu no Ambiente atu bele fó lisensa hanesan baze legal ba atividade jogu online ne’e.

Reportajen Kontribuidór Rafa.tl