Sinzas Mak Sinál Konversaun, Peniténsia, no Rekorda Kona-bá Ema Nia Frajilidade

Arsebispu Arkidioseze Metropolitana Díli, Dom Virgílio Cardeal do Carmo da Silva, SDB kose ahi-kdesan (sinzas) ba labarik no sarani sira iha misa Kuarta-Feira Sinzas iha Igreja Parókia Katedrál Nossa Señora Imaculada da Conceição, Vila-Verde, Kuarta (18/02/2026). Imajen/Rafa.tl

DILI, RAFA.tl– Ahi-kdesan (sinzas) ne’ebé sarani sira simu fó sentidu no sinál konversaun, peniténsia, no rekorda mudansa moris nian, kona-bá ema nia frajilidade ne’ebé hola parte iha ema nia isin lolon be mai husi rai-rahun.

Arsebispu Arkidioseze Metropolitana Díli, Dom Virgílio Cardeal do Carmo da Silva, SDB, iha nia omilia ba Missa Kuarta-feira Sinzas iha Igreja Parókia Katedrál Nossa Señora Imaculada da Conceição, Vila-Verde, Kuarta (18/02/2026) hatete, sinzas hanesan marka ida hodi loke sarani sira nia preparasaun durante loron 40 nia laran, ema ida-idak prepara nia aan hodi selebra Mistériu boot Kristu Nia mate no moris hias, nune’e sarani idak-idak mós bele moris hias hamutuk ho Kristu bainhira selebra Domingu de Ressureisaun.

Arsebispu hatutan, selebrasaun Kuarta-feira Sinzas ne’e hanesan loron ne’ebé Santa Kreda konvida sarani sira atu simu ahi-kdesan no hanoin katak ema mai husi rai-rahun no sei fila hikas ba rai, maibé rai-rahun ne’ebé folin boot iha Maromak nia matan.

“Rai-rahun ida ne’ebé kontein Maromak Nia mehi, maka Maromak Nia esperansa, ema maka Maromak Nia riku soin, no ema maka Maromak Nia Gloria. Ahi-kdesan ne’ebé kose iha ita nia rentos, fó hanoin ita perkursu ita nia ezisténsia ba moris ita ne’e rai-rahun, husi rai, maibé ita husik ita nia aan iha Maromak Nia liman no halo ita sai kriatura ida, buras tebes,” Arsebispu Arkidioseze Metropolitana Díli, Dom Virgílio Cardeal do Carmo da Silva, SDB hateten.

Iha inísiu Kuarezma ida ne’e maka tempu la’ós Maromak tau todan ba ema, maibé atu rekoñese katak iha nia mizéria Maromak hadomi nia povu sira.

Dom Virgílio Cardeal haktuir, durante Kuarezma ida ne’e Maromak mós konvida sarani idak-idak atu halo jejum durante loron 40, la’ós de’it jejum ba ai-han, maibé jejum mós ba ita nia hahalok no lia-fuan sira, buka atu hatene perdua malu no hatene mós husu perdaun.

Iha tempu Kuarezma ne’e mós oinsá hanorin sarani sira atu aprende kontrola hahán ne’ebé konsumu, buka atu hamlaha ba Maromak Nia Liafuan, no buka atu jejum mós ba ema idak-idak nia hahalok

“Bainhira ko’alia kona-bá jejum, jejum ida di’ak liu maka la’ós hahán de’it, maibé jejum mós ba ita nia hahalok sira hanesan, labarik, foin-sa’e, ferik no katuas, buka atu dezarma, hahalok sira ne’ebé ita toman, konta ema nia vida, tempu ida ne’e buka atu kontrola ita nia nanál, ita nia ibun, tempu ida ne’ebé dezarma ita husi tendénsia atu ko’alia aat,” Arsebispu tenik.

Dom Virgílio Cardeal do Carmo da Silva, SDB mós husu ba sarani sira liu-liu iha tempu Kuarezma ida ne’e hanorin mós sarani sira tenke hatene utiliza mídia sosiál ho dalan ne’ebé maka lolós, labele buka atu insulta malu de’it, buka atu labele trata malu liu husi mídia sosiál inklui líder polítiku sira, se de’it maka utiliza mídia sosiál, tenke uza ho responsabilidade no tuir dalan legál no pozitivu

Ba sarani sira, liu-liu iha tempu Kuarezma ida ne’e atu banati mensajem Santu Padre Leão XIV ba Kuarezma ne’ebé líder Katólika ne’e iha ninia karta ba Igreja Katólika iha mundu tomak hatete, Kuarezma 2026, Eskuta ka Rona Jejum no Hamutuk

Iha tempu Kuarezma ida ne’e sarani sira bele selebra loron saida de’it, bele festeza oi-oin maibé nu’udar sarani Katólika tenke hanoin mos tempu Kuarezma, buka atu reduz mos volume ksolok nian iha tempu Kuarezma

Líder Katólika Timor ne’e mós kontinua husu ba sarani sira, iha tempu Kuarezma ida ne’e, buka atu hatene moris hamutuk nu’udar maun-alin, liu-liu nu’udar komunidade sarani, buka atu hadi’a ita nia relasaun ema ba ema no ema ho Maromak.

Reportajen ekipa Rafa.tl