Sidadaun ho Nasionalidade Indonésia Hetan Pensaun Veteranu iha Ona Investigasaun

Ministru ba Asuntu Kombatente no Libertasaun Nasionál (MACLN, sigla portugés), Gil da Costa Monteiro “Oan Soru”. Imajen/Rafa.tl

DILI, RAFA.tl– Ministru ba Asuntu Kombatente no Libertasaun Nasionál (MACLN, sigla portugés), Gil da Costa Monteiro “Oan Soru” hatete, kazu sidadaun  ho nasionalidade Indonésia  inisiál FN  ne’ebé hetan pensaun veteranus tanba fasilita husi sidadaun balun iha ona prosesu investigasaun no entrega tomak ba autoridade kompetente hodi kontinua lori prosesu ne’e ba oin to’o hetan justisa ne’ebé justu.

Notísia Relevante: PNTL Halo Identifikasaun Ba Ema Na’in-rua Ne’ebé Deskonfia Fasilita Sidadaun Indonésia Hetan Pensaun Veteranu

Ministru ba Asuntu Kombatente no Libertasaun Nasionál, Gil da Costa Monteiro “Oan Soru” ba jornalista sira iha edifísiu MACLN Comoro, Segunda (05/01/2026), haktuir nia parte seidauk hatene informasaun klaru, ho nune’e, prosesu kapturasaun no identifikasaun  entrega ba autoridade kompetente atu halo servisu.

MCLN husu ba sidadaun hotu tenke koopera ho Estadu tuir rekezitu sira ne’ebé maka governu prevé ba sidadaun sira ne’ebé iha direitu atu simu pagamentu úniku ida ne’e.

“Kona-bá ema ne’e falsifika ka lae, ita hein prosessu, tanba ne’e iha hela PNTL nia liman ne’ebé husik prosesu la’o,’’ Ministru Gil da Costa Moneiro “Oan Soru” hateten.

Governate ne’e mós preokupa tanba saida maka sidadaun ida ho nasionalidade estranjeiru, maibé bele hetan mós dokumentu legál husi nasaun ne’e rasik. Nune’e, nia deskonfia instituisaun balu ne’ebé iha direitu trata dokumentu nasaun nia hanesan kartaun eleitorál, sertidaun RDTL  no Billete identidade (BI) mak fasilita hodi halo dokumentu legál sira ne’e.

‘’Ha’u rasik haré sidadaun ne’e bele hetan kartaun eleitorál, BI no sertidaun RDTL, ida-ne’e grave liu. Oinsá no razaun saida maka ema ne’e bele hetan dokumentu legál sira ne’e,  hatudu katak ita nia nasaun ne’e sei iha ema importante ne’ebé servisu iha instituisaun estadu sira koopera hela ho ema seluk hodi fó dokumentu legál ne’e ba ema seluk,”  nia afirma.

Iha Lei artigu 27 dehan, pensaun no sobrevivente, iha númeru 10 hatete katak, família ne’ebé maka hetan benefísiu husi mártires ida-ne’e nia osan nia labele kolabora voluntáriu ho inimigu kontra interese ukun rasik aan nian.

“Lei ne’e mós dehan, atu ha’u nia aman mate iha funu, mas se ha’u oan sunu povu nia uma mohu tiha, la gosta ukun aan, lakohi ukun aan, la gosta ha’u nia maluk balu karik, kontribui hamutuk ho inimigu, ne’e la iha direitu, lei prevé kedas iha ne’ebá, lei la autoriza, mas karik sidadaun autoriza, ne’e krime,” Nia subliña.

Reportajen ekipa Rafa.tl