Servisu Migrasaun Suspende Provizóriu Pessoál Ne’ebé Envolve iha Kazu Overstay WNI Feto Ida Sai Virál iha Mídia Sosiál

Ministru Interiór, Francisco da Costa Guterres. Imajen/Rafa.tl

DILI, RAFA.tl- Servisu Migrasaun Timor-Leste suspende ona pessoál ne’ebé fasilita sidadaun Indonézia (WNI/warga negara Indonesia) feto ida ne’ebé overstay no sai virál iha mídia sosiál Facebook.

Notísia Relevante: Autoridade Timor-Leste Hahú Investiga Kazu Overstay Ne’ebé Sidadaun Indonézia Halo Virál iha Mídia Sosiál

Intensaun Servisu Migrasaun deside halo suspensaun provizóriu ba pessoál Migrasaun ho inisiál O ne’e hodi submete ba prosesu investigasaun.

“Se nia sala, ita bele foti medida. Se nia lae, kontinua ba serbisu,” Ministru Interiór (MI), Francisco da Costa Guterres, hateten ba jornalista sira iha Sede Nasionál Konsellu Kombatente Libertasaun Nasionál (CCLN, sigla portugés), Tersa (03/03/2026).

Ministru Interiór hatutan relatóriu  ba kazu ne’e kuandu hotu ona sira sei haruka mai iha Ministériu Interiór hodi foti desizaun.

Oras ne’e daudaun Provedór Direitus Humanus no Justisa (PDHJ) mós halo nia investigsaun no investigsaun ba kazu ne’e atu hotu ona.

“Husik investigsaun la’o lai. Ita labele adianta buat ida lai. Investigsaun ne’e besik hotu ona,  ha’u atu hateten de’it katak Prevedór Direitus Humanus hala’o hela nia investigasaun ba kazu besik atu hotu depois sira mak sei hato’o ba ita,”  Ministru Francisco da Costa Guterres hateten.

Kona-bá medida suspensaun ba pessoál Migrasaun ne’e, Francisco da Costa Guterres  hateten Migrasaun iha autonomia administrativa no prosesu hotu sei lao tuir tramitas legál ne’ebé iha to’o prosesu investigasaun remata.

Reportajen Ekipa Rafa.tl