Semana Oin, Ministru Francisco Guterres Aprezenta Proposta Kandidatu Komandante Jerál PNTL Ba Konsellu Ministru

Jornalista sira halo doorstop interview ho Ministru Interiór, Francisco da Costa Guterres iha Ministériu Finasas, Díli, Sesta (06/03/2026). Imajen/Rafa.tl

DILI, RAFA.tl- Semana oin, Ministru Interiór (MI), Francisco da Costa Guterres, aprezenta proposta kandidatu Komandante Jerál no Segundu Komandante Jerál Polísia Nasionál Timor-Leste (PNTL) ba Konsellu Ministru hodi halo avaliasaun no halo desizaun molok hetan nomeasaun ofisiál.

Notísia Relevante: MI Hahú Halo Selesaun Ba Offisiál Superiór PNTL Na’in-Haat Ba Kargu Komandante Jerál no Segundu Komandante

“Prosesu ne’e sei la’o hela, loron-10 tan atu aprezenta proposta ida kona-bá eskolla Komandante Jerál ne’ebé iha loron 16 fulan-Marsu ne’e, ami halo selesaun, desizaun ne’e komisaun mak sei deside,” Ministru Interiór, Francisco da Costa Guteres, informa ba jornalista sira iha Ministériu Finansas, Sesta (06/03/2026).

Antes ne’e, Ministériu Interiór hahứ halo selesaun ba Superiór Polísia Nasionál Timor-Leste (PNTL) na’in-haat ne’ebé sei prienxe vaga rua ba kargu Komandante Jerál no Segundu Komandante Jerál molok aprezenta ba Konsellu Ministru hodi nomeia tuir lei

Ministru Interiór Francisco da Costa Guterres, seidauk bele fó sai Ofisiál Superiór na’in-haat ne’e nia identidade ba iha públiku tanba sei iha hela prosesu selesaun.

Informasaun ne’ebé Rafa.tl asesa husi fontes iha Komandu Jerál PNTL nian katak dau-daun ne’e iha pakote rua maka sei kompete ba Komandante Jerál foun ho segundu Komandante Jerál PNTL.

Naran sira ne’ebé sai hanesan diskusaun iha Komandu Jerál PNTL mak hanesan Superintendente Xefe Jorge Nelson Amado Monteiro hamutuk Superintendente Xefe Orlando Gomes (pakote ida), no pakote seluk mak Superintendente Xefe Afonso dos Santos ho Superintendente Xefe Justinho Menezes.

Iha loron 15 fulan-Marsu tinan 2023, Konsellu Ministru (KM) aprova projetu Rezolusaun Governu, hodi halo nomeasaun ba Superintendente-Xefe Henrique da Costa hodi ezerse kargu Komandante Jerál PNTL no Superintendente-Xefe Pedro Belo nu’udár Segundu Komandante Jerál PNTL ba períodu tinan tolu (2023- 2026), ho nune’e, promove ba Komisáriu Jerál PNTL.

Reportajen ekipa Rafa.tl