Selesaun Nasionál Timor-Leste Preparadu Partisipa FIFA World Cup U-15 iha Azerbaijaun

Preparasaun Selesaun Nasionál atu partisipa FIFA WORLD CUP U-15 iha Azerbaijaun.

Díli, 10 Outubru 2026 (RAFA) — Selesaun Nasionál Timor-Leste U-15 prepara daudaun atu infrenta  FIFA WORLD CUP U-15 ne’ebé sei hala’o iha Azerbaijaun hahú loron 24 to’o loron 30 fulan- Outubru, tinan ne’e.

Treinadór Selesaun Nasionál Timor-Leste, Miro Baldo Bento, hatete katak kompetisaun ne’e esperiénsia foun ba ekipa. Tanba, baibain sira treinu no orienta jogadór sira atu joga iha kampu boot. Maibé, nia dehan, iha kompetisaun FIFA U-15 WORLD CUP  ne’e, sira uza sistema jogu 8 kontra 8, ho jogadór na’in-hitu  iha kampu ne’ebé  ki’ik liu kompara ho kampu boot.

Miro Baldo Bento mós otimista tanba ekipa halo ona preparasaun másimu atu adapta ba regra no hasoru adversáriu sira.

“Ami  nia preparasaun ne’e kuaze fulan-rua. Nu’udar treinadór, ami hakarak ba hetan prestasaun, maibé ita hotu hatene katak, ita ba ne’e la’ós hasoru nasaun kiik, ita ba hasoru nasaun boot, ko’alia ba postura fiziku jogador nian, ita ba hasoru Austrália, Azerbaijaun, Haiti,” Miro Baldo Bento informa ba jornalista sira, Sesta-ne’e, iha knar fatin.

Nia parte sei avalia jogadór sira no prepara jogador 14 hodi ba kompete iha FIFA WORLD CUP  iha Azerbaijaun. Primeiru sira hahú ho jogadór 30 liu,  depois  halo tiha primeira faze ba jogadór  hela jogadór 23.

“Ami sei hasai tan para bele hela jogadór  na’in-14  hodi araka ba partisipa kompetisaun ne’e,” subliña Miro Baldo Bento.

Treinadór Selesaun Nasionál  ne’e haktuir jogu FIFA World Cup  U-15 ne’e sei hala’o ho sistema 8 kontra 8  ho jogu meiu kampu no kada parte minutu 20, no Timor-Leste tama iha grupu AF hamutuk ho Andora, Austrália, Azerbaijaun, Haiti no Israel.

Timor-Leste nia jogu dahuluk sei kontra Azerbaijaun iha loron 24 fulan-Outubru ne’e, no loron 25 iha  jogu rua hasoru Haiti ho Andorra, no iha loron tuir mai, 26 fulan-Outubru-ne’e,  Timor-Leste sei kontra Austrália no Israel.

Jornalista: Marito da Costa