Sekretariadu Komisaun Rekrutamentu Ofisialmente Anúnsiu Rekizitu Teste Ba Kandete PNTL

Sekretariadu Komisaun Rekrutamentu ba kadete foun PNTL 2025 ofisialmente anúnsiu rekizitu no métodu teste ba kandidatu kadete foun sira, Tersa (12/08/2025). Imajen/Rafa.tl

DILI, RAFA.tl–Sekretariadu Komisaun Rekrutamentu ba kadete foun Polísia Nasionál Timor-Leste (PNTL), Tersa (12/08/2025), ofisialmente anúnsiu rekizitu no métodu teste ba kandidatu kadete foun PNTL tinan 2025.

Notísia Relevante: Foin-Sa’e Atus to’o Rihun Entusiazmu Kompete Vaga Kadete foun PNTL

Liu husi konferénsia ba kmprensa ne’ebé realiza iha sala konferensia Sentru Formasaun Akademia Polísia Comoro, Supretendente Polísia, Antonio da Luz informa  bazeia ba diploma ministerial númeru 17/2025, ne’ebé hatuur iha artigu 29, 30 no 31, permite ba komisaun hodi fó sai prova selesaun sira.

Tuir artigu 29 iha métodu lima maka vale ba kandidatu sira, hanesan prova kultural ka ezame eskrita, aptidaun fizika, prova pisikolojia, entervista profisionál, no ikus liu mak prova mediku.

Supretendente Polísia Antonio da Luz hatutan,  prova sira ne’e hotu hola parte prosesu eleiminatoriu, la’ós akumulativu, signifika kandidatu ida la pasa iha prova lima ne’ebé mensionadu ida, maka komisaun sei elima ka hapara kedas bazeia ba artigu 31.

Bazeia ba artigu 30 ne’ebé iha, obrigatoriamente kandidatu sira tenke tuir prova matéria neen, hanesan lian tetun, lian portugés,  istoria, jeografia, matemátika no mós Konstituisaun Republika Demokratika Timor-Keste (K-RDTL).

“Sira pasa ona iha prova sira ne’e hotu, ikus maka sira ba iha prova entervista, hotu ba iha prova mediku, selesaun sira ne’e hotu, iha prosesu eleiminatoriu, katak nia bele passa iha prova fíziku, maibe iha prova tuir mai ida la liu, ne’e otomatikamente la liu ona,” António da Luz esplika.

António da Luz lia-tun tán katak, iha artigu 31 mós sita kona-bá prova aptidaun fiziku maka hanesan, fleksaun ho liman ba trave ka tara-aan, re-stock, push-up ba mane, estensaun liman ba rai-leten, push-up ba feto, fleksaun iha ai-riin ka set-up ba mane no feto, halai minutu  sanolu resin rua. Mane metru 2200 no feto metru 1008,  saltu ka haksoit moru mane no feto.

Komisaun rekrutamentu PNTL 2025 husu ba kandidatu sira atu prepara fiziku no mental ba kumpre rekizitu hirak ne’ebé maka prevalese  iha artigu 29 too 31.

“Prosesu hotu-hotu hanesan, kandidatu hotu tuir teste, la’ós fó fali prioridade ba Polísia nia oan ka veteranu nia oan ka, lae. Hotu-hotu hanesan deit, la’ós tanba polísia no veteranu nia oan otomatis tama, lae,” Superintendente Polísia António da Luz afirma.

Sekretáriu komisaun rekrutamentu ne’e husu ba kandidatu sira ne’ebé foti ona formuláriu hahu husi loron 05 to’o loron 15 fulan-Agostu, atu prepara kondisaun fíziku no mental hodi kompete tuir rekizitu sira ne’ebé prevalese.

Komisaun mós fó nafatin oportunidade ba joven sira ne’ebé seidauk foti formuláriu  atu kontinua habesik aan ba iha idak-idak nia munisípiu to’o iha loron 23  fulan-Agostu 2025.

Superintendente Polísia, António da Luz subliña liután katak prosesu selesaun ne’e garante transparansia no kualidade tanba envolve mós ho entidade hotu relevante sira, hanesan  ministériu Justisa no hetan observasaun direta husi Parlamentu Nasionál ho  Komisaun Anti-Korrupsaun (CAC, sigla portugés).

Provizoriamente, iha Munisípiu Díli, total kandidatu ne’ebé foti formuláriu hamutuk, 14.599. ne’ebé kompostu husi mane 10.919 no feto 3.676.

Reportajen ekipa Rafa.tl