SEKOMS Organiza Media Briefing Preparasaun Vizita PM Anthony Albanese

SEKOMS organiza media briefing nu’udár preparasaun ba vizita Primeiru-Ministru Austrália Anthony Albanese mai Timor-Leste. Imajen/Rafa.tl

DILI, RAFA.tl– Sekretáriu Estadu Komunikasaun Sosiál (SEKOMS), Expedito Dias Ximenes, Sesta (22/01/2026), organiza media briefing ho xefe redasaun  no jornalista sira husi média nasionál nu’udár preparasaun ba vizita Primeiru-Ministru Austrália Anthony Albanese mai Timor-Leste.

Iha  media briefing ne’ebé realiza iha sala reuniaun Diresaun Nasionál Desaminasaun Informasaun (DNDI) iha Palásiu Governu ne’e, hodi haré hamutuk no halo diskusaun kona-bá teknikamente atu halo kobertura ba  vizita ofisiál Primeiru-Ministru Anthony Albanese mai Timor-Leste iha loron 28 fulan-Janeiru tinan 2026.

Primeiru-Ministru Anthony Albanese sei to’o iha Aeroportu Internasionál Prezidente Nicolau Lobato Comoro, Díli, Timor-Leste hale’u tuku 10:00 dadeer Oras Timor-Leste.

Bainhira Xefe Governu Austrália ne’e to’o iha Aeroportu Internasionál Prezidente Nicolau Lobato, sei simu direta husi Prezidente Repúblika José Ramos-Horta, Primeiru-Ministru Kay Rala Xanana Gusmão no ministru na’in-tolu, inklui labarik na’in-rua ne’ebé maka sei tara-tais iha Aeroportu.

Remata tara-tais, aprezentasaun dansa kultura hamutuk ema 150, hanesan tradisaun Timor nian no simbolu bemvindu ba Primeiru-Ministru Anthony Albanese.

Prezidente Repúblika José Ramos-Horta ho Primeiru-Ministru Kay Rala Xanana Gusmão akompaña PM Anthony Albanese mai iha sala VVIP Aeroportu nian  hodi kontoinua kedas serimonia resesaun mai iha Palásiu Prezidensiál tuir ajenda Prezidente Repúblika nian.

Bainhira ajenda iha Palásiu Prezidensiál remata, Xefe Governu Austrália ne’e sei ba deskansa iha Hotél Palm Spring Fatuhada tuir oráriu tuku 10:20 dadeer oras Timor-Leste.

Hafoin oras deskansa, Primeiru-Ministru Anthony Albanese kontinua kedas ajenda iha Palásiu Governu no tuir oráriu tuku 11:00 OTL, enkotru bilaterál ho Primeiru-Ministru Kay Rala Xanana Gusmão, no kontinua kedas asinatura espasu deklarasaun konjunta entre Timor-Leste ho Austrália.

PM Anthony Albanese kontinua kedas ba Parlamentu Nasionál, hodi halo enkontru ho Prezidente Parlamentu Nasionál Maria Fernanda Lay inklui Xefe Bankada Parlamentár sira.

Hale’u tuku 07:00 kalan, PM Anhony Albanese kontinua serimónia jantar konfraternizasaun ho governu Timor-Leste iha Palasiu Nobre.

SEKOMS Expedito Dias Ximenes, husu medía sira tenke kobertura másimu iha ambitu visita Primeiru-Ministru Anthony Albanese iha Timor-Leste.

Sekretáriu Estadu ne’e afirma, eventu ida ne’e importante, hanesan mós eventu istóriku ida, dahuluk iha tinan ne’e xefe governu ida mai vizita Timor-Leste.

Komisaun organizadora ba eventu ida-ne’e lidera husi Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente Francisco Kalbuadi Lay, durante loron rua hahú husi loron 28 to’o loron 29 fulan-Janeiru 2026.

Tuir oráriu, Primeiru-Ministru Anthony Albanese sei fila hikas ba Austrália iha Kinta, 29 fulan-Janeiru 2026, hale’u tuku 07:00 dadeer OTL.

Reportajen ekipa Rafa.tl