Sara-Lima F.C Suzere Ba FFTL Fasilita Formasaun Ba Árbitru

Prezidente no treinadór ekipa futsal Sara-Lima F.C, Januário Freitas Ximenes

Díli, 18 Agostu 2026 (RAFA.TL) –Prezidente no treinadór ekipa futsal Sara-Lima F.C, Januário Freitas Ximenes, suzere ba Federasaun Futebol Timor-Leste (FFTL) atu fasilita formasaun hodi hasa’e kualidade árbitru iha rai-laran.

“Molok hahú liga futsal époka 2026, ha’u fó hanoin deit arbitrajen sira ne’ebé lidera ita nia liga futsal sira ne’e, presiza iha koñesementu di’ak tuir formasaun no treinamentu ne’ebé sira hetan atu nune’e bele lidera jogu  ho di’ak, liuliu iha foti desizaun sira, Januário Freitas hateten, Tersa-ne’e.

Nia hatutan, maski liga foin hala’o no falta esperiénsia bele sai parte husi prosesu aprendizajen, FFTL presiza kontinua fó formasaun no orientasaun ba árbitru sira, liuliu kona-bá oinsá atu lidera jogu ne’ebé iha tensaun aas.

“Se árbitru halo desizaun laho prudente, situasaun ne’e bele hamosu problema boot iha jogu, inklui konflitu entre jogador, ofisiál no espetadór,” Januário hatete.

Nia fó ezemplu kona-ba insidente ne’ebé akontese iha kompetisaun Copa AFTL entre Sara-Lima F.C no Maudoko, ne’ebé tuir nia hanoin, kestaun seguransa no dezakordu durante jogu hamosu situasaun ne’ebé halo adeptu tama ba kampu laran  no halo problema ho jogador sira.

Nia espera katak FFTL bele fó atensaun ba kualidade arbitrajen, tanba árbitru iha papel importante tebes atu garante jogu lao tuir regra no evita polemika ne’ebé bele prejudika relasaun entre klubu sira no garante kualidade kompetisaun.

Jornalista: Marito da Costa