Santa-Cruz F.C Empata ho Karketu Díli F.C ho Score 1-1

Jogu Santa-Crus F.C vs Karketu Dili F.C, Sábadu 27 Juñu 2026. Imajen/LFTL

Díli 28 Juñu 2026 (RAFA.TL)- Santa-Cruz F.C seusesu rekolla pontu ida hafoin empata ho nia adversáriu Karketu Díli F.C ho score 1-1, iha jogu kontinuasaun Primeira Divizaun Liga Timorense époka 2026.

Jogu ekipa rua ne’ebé hala’o iha Estádiu Munisipál Díli, Sábadu (27/06/2026), jogadór hamutuk ho adeptus sira ne’ebé asiste jogu ekipa rua ne’e halo um minuto de silêncio hodi fo omenajen ba Saudozu eis-Prezidente Repúblika Francisco Guterres Lú-Olo.

Santa-Cruz F.C ne’ebé desde minutu 16 tenke joga ho jogadór nain-10 tanba kapitaun Freteliano dos Santos sofre kartaun mean hafoin halo falta hasoru jogadór adversáriu.

Maske ho deit Jogadór na’in-10, Santa-Cruz F.C susesu marka uluk golu ba Karketu Díli F.C no ikus mai Karketu Díli F.C halo hikas empata ba jogu ne’e.

Iha jogu primeira parte, ekipa rua hatudu jogu agresivu, maibé tama ba minutu 16 Santa Cruz F.C tenke lakon sira nia kapitaun no jogadór meu-kampu  Frentino dos Santos  tanba hetan kartaun mean hafoin komete eru hasoru jogadór na’in-rua  husi Karketu Díli F.C.

Menus jogadór ida halo Santa-Cruz F.C hetan difikuldade hodi halo jogu ho livre, maibé mantein halo kontra atake ba adversáriu.

Karketu Díli F.C ne’ebé iha oportunidade hodi domina jogu la aproveita momentu sira iha primera parte ho nune’e ekipa rua tenke mantein ho score 0-0 to’o intervallu.

Tama ba segunda parte, ekipa Santa-Cruz F.C halo kedas substituisaun hodi koko halo balansu ba jogu no hasa’e ritmu jogu iha kontra atake hodi bele marka golu.

Ekipa Karketu Díli F.C ne’ebé ho jogadór kompletu fasil los atu halo jogu ho livre no domina jogu ne’e, maibé adversáriu la fó oportunidade hodi halo jogu ida ho disiplina no mantein liña kotuk ho metin hodi asegura baliza husi golu.

Tama ba minutu 56, Santa-Cruz F.C marka uluk golu ida liu husi jogadór Miguel Silva  liu husi kabesada hafoin simu bola husi sutu kantu no Santa-Cruz F.C lidera provizoriu ho score 1-0.

Liu deit minutu 10, Karketu Díli F.C liu husi nia jogadór Muhammad Mumi marka golu ida husi área penalidade liur no golu ne’e halo ekipa rua empata ho score 1-1.

Karketu Díli F.C kontinua lansa atake ba Santa-Cruz F.C maibé laiha tan golu ruma akontese. Ekipa rua kontinua halo kontra atake ba malu no kontinua asegura pontu ne’ebé iha no la muda score iha tabela to’o jogu termina.

Ho rezultadu ne’ebé iha Karketu Díli F.C kontinua lidera tabela klasifikasaun Liga Timorense époka ne’e no Santa-Cruz F.C iha terseira klasifikasaun.

Jornalista : Davilio Valdamir/Editór: Vito Salvadór