Saláriu Décimo Terceiro La Kompletu, Funsionáriu DNSPP Halo Protesta iha Ministériu Interiór

Funsionáriu sira DNSPP nian halo asaun protesta tanba sira-nia saláriu décimu terceiro no osan alimentár fulan-Dezembru nian seidauk simu. Imajen/Rafa.tl

DILI, RAFA.tl-Funsionáriu sira husi Diresaun Nasionál Seguransa Patrimóniu  Públiku (DNSPP) hamutuk na’in-50 resin, Tersa (30/12/2025), halo protesta hasoru dirijente sira, inklui hasoru Ministru Interiór, Francisco da Costa Guterres, tanba la satisfas ho sira-nia saláriu décimo terceiro tama la kompletu no sira-nia osan alimentár nian iha fulan-Dezembru ne’e seidauk tama.

Funsionáriu DNSPP hirak ne’e, hahú uluk sira-nia asaun protesta iha edifisiu DNSPP, Caicoli, Díli, hodi husu klarifikasaun husi sira-nia diretór, Rogeiro de Araújo, maibé la iha nia knar fatin tanba  halo enkontru iha Ministériu Interiór, nune’e sira organiza malu ba iha Ministériu Interiór, maibé mosu dezentendimentu ho pesoál balun iha ministériu refera tanba konsidera sira-nia prezensa halo barullu deit.

“Labele hakilar ami, tanba ami mai ezizi ami nia direitu no husu esplikasaun husi nai-ulun sira kona-bá tansá ami nia saláriu décimo terceiro  la kompletu no ami mós seidauk simu osan alimentár fulan-Dezembru nian,” pesoál funsionáriu balun DNSPP ne’ebé halo asaun protesta ne’e haktuir hodi foti lia hasoru funsionáriu Ministériu Interiór ida ne’ebé halo intervensaun bandu  funsionáriu DNSPP halo barullu iha arredór ministériu nian.

Iha loron 13 fulan-Dezembru 2025, Konsellu Ministru (KM) rasik aprova Dekretu-Governu kona-bá direitu saláriu décimo terceiro ba funsionáriu públiku hotu-hotu, inklui funsionáriu administrasaun indireta sira.

“Segunda, 29 fulan-Dezembru tinan 2025, osan ne’ebé mak tama, balun  US$80.00 de’it,  no agora dadauk ha’u nian simu deit  US$10.00, tanba ne’e mak ami  mai husu tuir bazeia ba Dekretu-Lei saida mak ko’a ami nia salariu décimo terceiro,” Simão Ximenes, funsionáriu DNSPP hateten hodi aprezenta mós resivu osan ne’ebé tama iha nia konta bankaria iha Banco Nacional Comércio Timor-Leste (BNCTL).

“Ha’u nia kolega balun simu saláriu décimo terceiro ne’e US$70.00, US$80.00, US$100.00, más tuir loos ami nia direitu saláriu décimo terceiro ne’e la bele ko’a,” Simão Ximenes afirma.

Saláriu alimentár ne’ebé merese ba funsionáriu sira DNSPP atu simu iha fulan-Dezembru ne’e  purvolta US$75.00 kada pesoál. Maibé, direitu ba ida-ne’e mós seidauk simu to’o ohin loron.

Ministru Interiór (MI) Francisco da Costa Guterres, ne’ebé tun direta hasoru  malu ho funsionáriu DNSPP rekoñese osan ba alimentár fulan-Dezembru ne’e ba funsionáriu DNSPP seidauk sai no nia promete rezolve iha fulan-Janeiru 2026.

“Ita hotu la hetan, imi nia direitu osan alimentár falta fulan ida de’it (Fulan-Dezembru nian). Ne’e sei selu hotu, imi lalika preukupa, imi fiar ha’u, ita sei rezolve problema ne’e tanba ne’e imi fila ba servisu de’it,” Francisco da Costa Guterres hateten.

Kona-bá saláriu décimo terceiro, Ministru Francisco da Costa Guterres, deklara katak sira-nia parte mós seidauk simu hotu, atraza oituan mas la signifika osan ne’e lakon ona.

“Ita hotu enfrenta situasaun hanesan, katak saláriu décimo terceiro ne’e atraza oituan tanba kestaun tékniku balun, tanba afeta husi funsionáriu DNSPP balun foin lalais hatan promosaun hasa’e grau. Imi fiar ha’u, imi ba servisu, ita sei hamutuk, ha’u sei hadi’a imi nia problema sira ne’e hotu,” Ministru Francisco da Costa Guterres, hateten.

Reportajen Ekipa Rafa.tl