Sábadu, Atleta Atletizmu Nasionál Na’in-200-resin Tuir Teste no Selesaun Ba Díli Internasionál Maratona 2026

Díli, 06 Maiu 2026 (RAFA.tl)- Komisaun Organizadora ba Eventu Internasionál Díli Internasionál Maratona 2026, Sábadu  09 fulan-Maiu ne’e, sei halo teste no selesaun ba atleta atletizmu nian hamutuk na’in- 200-resin molok kompete ho país sira seluk iha fulan-Agostu mai.

Komisaun Organizadora no Prezidente Konfederasaun Desportiva Timor-Leste (CDTL), Afranio Xavier, ba jornalista sira iha Palásiu Prezidensiál, Díli,  Kuarta (06/05/2026) hateten, iha loron 9 fulan-Maiu ne’e, sei halai korida kilometru 21 nu’udár teste ida atu halo preparasaun ba iha loron 08 fulan-Agostu.

Nia esplika rute ne’e la hanesan ho sira uluk Dili Maratona iha 2025, maibé iha mudansa rute, hahú partida hosi Palásiu Prezidénsial nia oin, liu hosi Ministériu Finansas, Motael, Palásiu do Governu, Ponte B.J Habibie to’o ba iha Àrea Branca, Dolok-oan.

To’o Dolok-oan sei fila-fali mai kontinua ho rute ne’ebé hanesan liuhosi Ponte B.J Habibie mai Palásiu Governu, too iha Palasiu Governu sei kontra tranjitu la fila ba liman karuk maibé liu hosi Otel Timor nia oin depois remata mai iha Palásiu Presidensiál nia oin.

“Ami husu ba ita nia komunidade tomak hahú oras tuku 5:00 dadeer too  tuku 10:00 otl hamenus no labele halo mobilizasaun iha fatin ne’ebé mak ita nia atleta sira atu halai liubá,”  Afranio Xavier informa.

Prezidente Konfederasaun Desportu Timo-Leste (CDTL, sigla portugés) ne’e esplika, to’o ohin loron atleta atletizmu nian hamutuk ona na’in- 200 liu, komesa aban loraik to’o baintolu dadeer, sira sei iha oportunidade para simu númeru de Dorsal, númeru dorsal ne’e para iha loron 9 dadersan, hale’u tuku 4:00 dadeer, sira sei konsentra iha Palásiu Prezidensiál oin hodi hahú halai ba kilometru 21 nian.

“Iha maratona atleta ho idade tinan 17 mak bele partisipa ida ne’e hanesan meius ida atu koko rute foun no koko mós selesiona ba ita nia Aaleta nasional,” nia tenik.

Atu sai ekipa nasionál hodi reprezenta Timor iha Eeentu ne’ebé mak sei akontese iha loron 08 fulan-Agostu 2026, hotu hatene katak nasaun hotu sei presiza, tanba ne’e mak presiza teste atleta  nasionál sira atu haré sira-nia kapasidade no forsa nune’e forma sira durante fulan hira nia laran, atu enfrenta iha Dili Internasionál Maratona iha loron 08 fulan-Agostu, tinan ne’e.

Iha fatin hanesan, Superientedente Asistente, Roberto Pereira dos Santos, konfirma  relasiona ho atividade loron  09 fulan-Maiu nian kona-bá selesaun maratona nasionál nian hosi komandu Polísia Nasionál Timor-Leste (PNTL) hatun ona diretiva operasaun ba iha Komandu  Polísia Munisípiu Díli ba Unidade Espesiál no mós apoiu sira hosi Sentru Formasaun Polísia atu bele asegura rute sira ne’ebé maka mensiona.

“Avizu ba iha komunidade sira, iha loron Sábadu karik ita-boot sira laiha atividade urjente, di’ak liu ita-boot sira hakmatek iha fatin bele mai asiste atividade ne’ebé mak realiza hosi ita nia Prezidensia Republika no Governu, iha Dili Maratona ba selesaun nasionál ninian,” nia hateten.

Rute sira ne’ebé maka mak atelata sira sei liu sei taka, mak hanesan iha Palásiu Prezidensiál nia  nia oin, iha parte Fatuhada ninian sei taka besik kedas ba iha Meskita An-Nur nian sa’e mai iha kedas kruzamentu entre Palásiu Prezidente ho Mesjid ninian.

Atividade ne’e remata iha tuku 09:00 OTL entaun dalan sei loke iha  tuku 09:00 ba leten, tanba ne’e avizu ba iha traballador sira, liu-liu ba iha kompañia sira tenke koopera ho Estadu, atu nune’e labele liu iha dalan alternativu, no labele ezije atu tama iha área sira ne’ebé maka Governu deside ona sei taka iha Sábadu, 09 Maiu 2026.

Jornalista: Marito da Costa/Editór: Vito Salvadór