Ronaldo-Ramos Lori Portugal Ba Jornada 16 Hafoin Halakon Kroásia 2-1

Portugal vs Kroásia iha kopa mundiál 2026. Imajen/AFP

Díli, 03 Jullu 2026 (RAFA.TL)- Jogadór estrella Portugal Cristiano Ronaldo (CR7) ho nia kompatriota Gonçalo Ramos lori nina ekipa Portugal (Seleção das Quinas) avansa ba jornada 16 hafoin rekolla vitória dramatiku kontra Kroásia ho score 2-1, iha estádiu Estádiu Toronto, Sesta (03/07/2026).

Jogu ekipa rua hahú ho intensidade as. Kroásia halo kedas presaun antesipadu iha minutu tolu, maibé suta Ante Budimir halai sees hosi poste karuk. Portugál hatán liu suta Bruno Fernandes nian, maibé sei salva hosi guarda-redes Dominik Livakovic.

Portugál nia oportunidade tuirmai mosu liuhosi esforsu dook hosi João Cançelo iha minutu hitu, ne’ebé maka hakat liu trave. Kroásia kontra kedas, maibé kabesa Budimir sei dook husi alvu mós.

Iha minutu 16, Renato Veiga halo kabesada ida aproveita bola kantu ne’ebé lansa husi Nuno Mendes , maibé ninia kabesa liu husi baliza kroata nian. João Neves mós iha oportunidade ho suta dook iha minutu 24, maibé semo dook hosi alvu.

Portugál kontinua halo presaun ba Kroásia, Cançelo lansa bola kruza ida ba Cristiano Ronaldo iha área penalidade iha minutu 30, maibé nia la konsege konverte oportunidade ne’e ba golu. Ekipa rua mantein ho score 0-0 too parte dahuluk remata lahó golu.

Hafoin deskansa, Kroásia joga ho intensidade aas liután. Mateo Kovacic tama iha área penalidade nian no lansa sutu ida iha minutu 48 maibé nia remate hetan blokeiu hosi guarda-redes Portugal Diogo Costa.

Kroásia nia atake sira ikusmai fó rezultadu iha minutu 53. Kruzamentu ida husi Josip Stanisic to’o ba Ivan Perisic, ne’ebé remata oportunidade ho drive baixu maka’as ne’ebé halakon Diogo Costa no muda score ba 1-0.

Kroásia kontinua halo presaun ba ekipa Portugal no tama ba iha minutu 56, Igor Matanovic marka tan golu ida maibé la permite tanba Nikola Vlasic, ne’ebé fó asisténsia, iha pozisaun offside.

Portugál hafoin ne’e tenta atu halo retornu, Rafael Leao iha oportunidade iha minutu 58, maibé nia suta dook kona poste. Ronaldo mós iha oportunidade marka golu iha minutu 61, maibé golu ne’e la permite tanba iha pozisaun offside.

Golu ne’ebé Portugál hein ikus mai iha minutu 68’. Falta ida hosi Vlasic hasoru Renatu Veiga iha área penalidade nian durante suta kantu halo árbitru hatudu ba penalti hafoin revizaun VAR nian. Ronaldo hakat ba oin hodi foti penalidade no ho susesu marka golu hodi mnuda score ba 1-1.

Kroásia kontinua kalma no Kovacic besik atu marka golu iha minutu 75, maibé nia suta ho distánsia dook hetan ponta hosi Diogo Costa no kona poste. Kroásia hetan fali pose ba bola ne’ebé lakon no Kovacic iha tan oportunidade ida, maibé nia esforsu hetan fali impedimentu hosi Diogo Costa.

Igor Matanovic mós iha oportunidade iha minutu 77, maibé nia suta husi kaixa laran nega husi Diogo Costa. Entretantu, kabesa ida hosi Mario Pasalic iha minutu 89 sai hosi poste loos.

Ikus mai Portugál lidera iha tempu estra segunda parte, liu husi golu Goncalo Ramos nian iha minutu 90+4 hafoin aproveita bola kruza ida hosi Rafael Leao no kabesada bola tama ba kantu los no baliza Kroásia Livakovic labele hapara.

Kroásia halo empata iha minutu 90+13 liuhosi Josko Gvardiol, maibé golu ne’e la permite hosi árbitru tanba offside iha preparasaun. Jogadór kroata sira kestiona desizaun ne’e, maibé árbitru hamriik ho nia xamada. Eskore 2-1 mantein to’o apitu finál.

Ho rezultadu ida ne’e, Portugál sei hasoru España iha Jornada 16. Jogu ne’e ajenda ba Tersa (07/07/2026) iha Estádiu Dallas.

Jornalista: David Gonçalves/Editór: Vito Salvadór