Rivaldinho Gusmão Salva Assalam F.C Hosi Derrota iha Jornada Da-ualu Liga Timorense Époka 2026

Karketu Díli F.C vs Assalam F.C.

Díli, 18 Jullu 2026 (RAFA.TL)- Jogadór Rivaldinho Gusmão sai erói ba Assalam F.C, hafoin marka golu importante ne’ebé salva nia ekipa hosi derrota kontra Karketu Díli F.C, iha jogu kontinuasaun Liga Timorense Primeira Divizaun, jornada da-ualu.

Duelo entre ekipa rua ne’ebé hala’o iha Estádiu Munisipál Díli, Sesta-ne’e, desde inisiu jogu Karketu Díli F.C, ne’ebé nu’udar kampiaun Liga Timorense Primeira Divizaun iha époka 2025, hahú jogu ho dominasaun.

Ekipa Karketu Díli F.C domina  no kontrolu bola hodi fó presaun maka’as ba Assalam F.C, ho intensaun atu produs golu iha inísiu jogu.

Esforsu husi ekipa Matak Malirin nian ne’e ikus mai fó rezulatadu pozetivu iha minutu 29, rede Assalam F.C ikus mai nakles liu husi nia makina golu, Daniel Asino, ne’ebé marka golu dahuluk ba ekipa zigante Munispiu Díli Karketu Díli F.C hodi lidera uluk ho score 1-0.

Hafoin golu ne’e, Karketu Díli F.C kontinua kontrola ritmu jogu no buka atu aumenta golu. Assalam F.C, tenta buka dalan atu responde no hasoru presaun husi ekipa Matak Malirin, maibé to’o termina jogu priemeira parte ekipa Karketu Díli F.C mantein lidera ho score 1-0.

Iha segunda parte, ekipa rua hahú hika’as jogu ho intensaun boot atu buka golu. Karketu Díli F.C no Assalam F.C lansa kontra-atake ba malu, ho presaun forte no ritmu jogu ne’ebé aas.

Kada ekipa buka oportunidade atu kria ameasa iha área penalti adversáriu. Karketu Díli F.C buka atu aumenta nia vantajen, enkuantu Assalam F.C luta maka’as atu buka golu empate.

Tama ba Iha minutu 61, Assalam F.C ikus mai konsege responde golu ida liu husi Rivaldinho Gusmão ne’ebe sai nu’udar figura importante ba nia ekipa, hafoin marka golu empate ne’ebé halo rezultadu sai balansu 1-1 no salva mos ekipa hosi derrota.

Golu ne’e fó motivasaun fali ba Assalam F.C, ne’ebé konsege fila ba jogu hafoin sofre uluk golu ida iha primeira parte.

Ho rezultadu 1-1, ekipa rua kontinua buka oportunidade atu marka golu vitória iha minutu sira ikus, maibé to’o termina jogu segunda parte score 1-1 mantein la muda.

Ho rezulatadu empata ne’e hatuur ekipa Karketu Díli F.C iha pozisaun da-tolu ho pontu 17 husi jogu ualu, manan lima, empata rua no derrota ida. Enkuantu ekipa Assalam F.C mantein iha pozisaun da-neen ho pontu sia husi jogu ualu, manán rua, empata rua no derrota haat.

Jornalista: Davilio Valdemir/Editór: Vito Salvadór