Relatóriu BCTL: Ekonomia Timor-Leste Bele Sa’e 5% iha 2026, Maibé Problema Estrutural Sei Nafatin

Imajen/BCTL

DÍLI, RAFA.tl– Ekonomia Timor-Leste previstu sei sa’e besik 5% iha tinan 2026, depois  kresimentu 4,6% iha tinan kotuk. Maibé, Banku Sentral Timor-Leste (BCTL, sigla portugés) alerta katak ekonomia sei depende barak husi despeza públika, Fundu Petrolíferu no importasaun.

Notísia Relevante: Governu Prioritiza Infraestrutura Nasionál no Dezenvolvimentu Projetu Tasi Mane Ba Hasa’e Kreximentu Ekonómiku

Iha relatóriu dezempeñu ekonómiku Timor-Leste 2025 ne’ebé públika, Segunda (23/03/2026), BCTL konsidera katak situasaun makro ekonómika hatudu sinal rekuperasaun, liu-liu iha inflasaun, ne’ebé tuun ba 0,5%, ki’ik liu kompara ho tinan sira liubá.

Antes ne’e, inflasaun tuun iha 2,1% iha 2024 no to’o 8,4% iha 2023. Diminuisaun husi inflasaun ne’e ajuda hamenus sasán nia presu, nune’e oportuniza família sira atu halo kompras ba konsumu privadu no mellora rendimentu real família nian. Relatóriu mos hatete katak rendimentu per capita (PIB Produto Interno Bruto) rekupera besik 1.298 dólar, besik ba nível aas liu ne’ebé rejista iha 2016.

Maski iha progresu sira ne’e, relatóriu hatudu katak ekonomia Timor-Leste seidauk forte. Atividade ekonomia sei depende barak ba Governu, polítika orsamentu ne’ebé boot no investimentu públiku, liu-liu iha estrada no ponte.

Iha 2025, Governu nia gastu sa’e 8,6% no orsamentu nasionál aumenta 17%, to’o 2,62 billaun dólar Amérika. Maibé barak husi sasán no servisu ne’ebé Governu presiza mai husi importasaun, ida ne’e halo produsaun iha rai laran la sa’e no aumenta desekilíbriu external.

Gastu privada mós sa’e, estimadu 3,1%, apoiadu husi saláriu, transferénsia públika, kréditu no transferénsia osan, maibé estrutura kresimentu sei konsentra liu iha interna, nune’e espansaun ne’e hatudu katak baze produsaun nasionál sei forte. Investimentu privada mos sa’e 8,8% iha 2025, maibé kontinua reprezenta de’it, besik 5,7% husi PIB, no konsentra liu iha konstrusaun no komérsiu, la alarga ba indústria, agroprosesamentu ka setór exportasaun. Setor privada iha Timor-Leste sei ki’ik no depende liu ba atividade ne’ebé Governu kria.

BCTL enfatiza katak kresimentu ekonomia iha tempu badak la sufisiente atu rezolve problema estrutural sira. Problema boot sira hanesan dependénsia aas ba Fundu Petrolíferu, falta diversifikasaun baze produtiva, kapasidade exportasaun ki’ik no obstákulu ba investimentu privada, husi falta seguransa rai to’o limitasaun iha asesu ba kreditu no regulasaun la efisiente.

Timor-Leste krese dau-daun hela, maibé seidauk iha modelu ekonomia ne’ebé sustentável ba futuru depois de petróleu ne’e hotu. Dependénsia ba despeza públika, Fundu Petrolíferu, importasaun no setor privada la diversifikadu kontinua sai obstákulu boot ba sustentabilidade. Relatóriu mos identifica risku prinsipal sira hanesan produsaun remata iha Bayu-Undan, kompetitividade externa ki’ik, baze exportasaun limitadu no mobilizasaun reseita interna la sufisiente.

Mensajen prinsipal mak, Timor-Leste presiza transforma kresimentu ekonomia ba kapasidade produtiva, katak foti risku hodi mantém valor pozitivu sira iha curto prazo maibé ida ne’e la garante reziliénsia iha tempu naruk.

Se la iha reforma sira atu fortalese setór privada, aumenta produtividade no habelar reseita interna, entaun kresimentu ekonomia sei la sufisiente atu garante estabilidade permanente no kria empregu di’ak ba povu.

Reportajen Ekipa Rafa.tl