Reksy Kurniawan Lori Karketu Díli F.C Lidera Hikas Tabela Klasifikasaun Liga Timorense Primera Divizaun

Karketu Díli F.C vs Porto Taibesse F.C. Imajen/LFTL

Díli, 22 Juñu 2026 (RAFA.TL)- Karketu Díli F.C susesu lidera hikas tabela klasifikasaun provizoriu Liga Timorense Primera Divizaun hafoin halakon nia adversáriu F.C Porto Taibesse ho score 1-0 liu husi golu úniku ne’ebé marka hosi Reksy Kurniawan.

Jogu kontinuasaun Liga Timorense Primera divizaun jornada da-toluk ne’ebé hala’o iha Estádiu Munisipál Díli, Sábadu (20/06/2026), inisiu kedas jogu ekipa rua  hatudu vontade boot atu domina jogu tuir ritmu idaidak nian.

Maske armada Matak Malirin tenta halo presáun no kria oportunidade oioin, maibé F.C Portu Taibesse mantein liña defensiva ne’ebé forte.

Antes atu termina jogu priemeira parte tensi jogu sa’e lalais liu tanba ekipa rua ne’e aumenta intensidade atu buka golu. Maske nune’e, liña defesa no guarda-rede husi ekipa rua servisu ho di’ak tebes, hodi asegura oportunidade hotu-hotu no la lori mudansa ba score to’o jogu priemeira parte termina.

Kontinua ba jogu segunda parte Karketu Díli F.C konsege domina liu bola hodi lansa suta fila fila ba rede F.C Porto Taibesse maibé tentativa oioin ne´ebé lansa hosi zigante Munispiu Díli ne’e seidauk bele rezulta golu.

F.C Porto Taibesse la’ós la iha oportundade iha jogu Segunda parte, maibé oportunidade ne’ebé lansa hosi F.C Porto Taibesse iha jogu segunda parte la kona iha alvu.

Golu hosi ekipa Matak Malirin nian foin mak akontese iha minutu 89 liu hosi asaun kabesada Reksy Kurniawan hodi lori ekipa zigante Munisípiu Díli ne’e lidera ho score 1-0 to’o termina jogu segunda parte.

Husi rezulatadu vitória ne’e lori ekipa Matak Malirin lidera hikas tabela klasifikasaun provizoriu ho pontu sia (9) hosi jogu tolu ne’ebé hala’o ho rezultadu manan hotu.

Ekipa F.C Porto Taibesse mantein iha pozisaun karaik liu iha tabela klasifikasaun ho pontus ida hosi jogu tolu iha ne´ebé derota dala rua no empata ida.

Jornalista: Davilio Valdemir/Editór: Vito Salvadór