Rekrutamentu Ajente PNTL Foun Manatuto Mós Deskonfia iha Favoritizmu

Lista rezultadu kandidatu ajente PNTL hamutuk na'in-25 husi Munisípiu Manatuto ne'ebé aprova ba teste médiku. Imajen/repro

MANATUTO, RAFA.tl-Iha Tersa-feira, 03 fulan-Fevereiru 2026, ekipa juri Komisaun Rekrutamentu bá Kadete foun PNTL 2025 ne’ebé kompostu hosi Komandu Jerál PNTL ho Ministériu Interior (MI), anúnsia rezultadu prova kultural, prova aptidaun fízika, prova psikolójiku, no entrevista profisionál bá kandidatu sira hamutuk 10.597 mak liu iha selesaun.

Notísia Relevante: FONGTIL Husu Ministériu Interiór ho Komandu PNTL Anula Lista Ajente Foun Na’in-400

Husi númeru ne’e Komisaun Rekrutamentu deside kandidatu hamutuk na’in-400 de’it mak hetan oportunidade hodi hakat faze teste médika nian iha loron 10 fulan-Fevereiru ne’e.

Desizaun ne’e halo kandidatu sira ne’ebé mós nia naran aprovadu, no labele hakat bá teste faze médika nian tanba valór ki’ik, sente la satisfás, tanba tuir sira, durante prosesu selesaun bá rekrutamentu ne’e, deskonfia mosu sistema favoritizmu ka familiarízmu, tanba kandidatu sira ne’ebé atu bá tuir teste médika ne’e, maiória komandante ka superiór sira iha instituisaun PNTL nia oan rasik, inklui sira ne’ebé iha ekipa komisaun rekrutamentu nia oan mós.

Iha Komandu PNTL Munisípiu Manatuto, deskonfia Inspetóra Asistente Polísia ho inisial PG fasilita nia oan-feto rasik ho  inisial FSG ne’ebé ho estatutu iha ona oan mós iha selesaun rekrutamentu ne’e no okupa iha númeru –x6– hodi priénxe lísta kandidatu Munisipiu Manatuto nian.

Fonte ida nu’udár Autoridade Lokál iha Manatuto ne’ebé husu atu la bele públika nia identidade, informa bá Rafa.tl,  Sábadu (07/02/2026), iha Manatuto, hateten katak, kandidatu ida ho naran inisial FSG ne’e ho estatutu oan-na’in,  no iha momentu ne’ebá rekizitu sira ne’ebé konstra iha regulamentu Rekrutamentu nian katak  ema ne’ebé oan-na’in ka iha ona oan labele submete dokumentu.

Fontes ne’e hateten tanba de’it kandidatu ne’e nia inan-rasik nu’udár mós membru Komisaun Rekrutamentu PNTL nian iha Komandu Munisípiu Manatuto, ho diviza Inspetór Asistente Polísia, ikus mai simu nia oan nia dokumentu sira no rejísta iha lista kandidatura.

“Rekizitu rekrutamentu nian ne’ebé haktuir husi Komisaun Rekrutamentu PNTL 2025 dehan oan-na’in ka iha ona oan, labele hatama dokumentus, maibé Komisaun Rekrutamentu  hatama ka admite kandidatu ho inisiál FSG tanba de’it nia inan Inspetóra Asistente Polísia ho inisial PG membru Komisaun Rekrutamentu no momentu ne’ebá membru Komisaun Rekrutamentu ida hakerek iha justifikasaun dehan oan-na’in, hamosu kedas polemika  no nia inan Inspetóra Asistente Polísia ho inisiál PG defende dehan labele hakerek nia oan nia estatutu dehan oan-na’in. Nia maka númeru –x6– ne’e,” fonte ne’e informa.

Prátika  ne’e mós deskonfia  komete hosi Asistente Inspetór ho naran inisial FGdC, tanba fasilita nia oan-feto rasik ho naran inisial LFIdC liu mós iha selesaun rekrutamentu PNTL Munisipiu Manatuto nian no okupa iha númeru –x1–.

Iha mós informasaun seluk ne’ebé Rafa.tl asesu katak, kandidatu ho naran inisial CPQSdC ne’ebé mak okupa iha númeru –x1x– iha lísta kadete foun Manatuto nian, deskonfia fasilita mós hosi nia tiu rasik ne’ebé nu’udár Ofisiál Superiór ida hosi Komandu PNTL Munisípiu Manatuto.

Hatán bá akuzasaun no denúnsia sira deskonfia pratika favorizmu no familiarizmu iha rekrutametu PNTL 2025, Ministru Interiór (MI), Francisco da Costa Guterres, iha Palásiu Governu, Kuarta (04/02/2026), ba jornalista sira, hateten sei aplika sansaun bá superiór sira PNTL nian ne’ebé deskonfia fasilita sira nia oan-rasik no família iha prosesu rekrutamentu PNTL nian.

Ministru Francisco da Costa Guterres, afirma tan bainhira identifika hetan, la’ós aplika sasaun bá membru PNTL sira ne’ebé fasilita, maibé mós sei hasai hotu kandidatu sira ne’ebé naran aprova, maibé la liuhosi prosesu teste ne’ebé lo-loos.

Tuir kuota rekrutamentu ajente  PNTL foun  bá Munisípiu Manatuto, presiza ema hamutuk na’in-25. Hosi númeru ne’e, sei foti ema na’in-lima (5) kada postu administrativu.

Munisípiu Manatuto kobre postu administrativu neen (6), mak hanesan Postu Administrativu Barique, Laclubar, Laleia, Manatuto Vila, Soibada ho Postu Administrativu Laco.

Reportájen Ekipa Rafa.tl