Reinu Unidu Kongratula Timor-Leste Nia Adezaun Ofisiál Nu’udar Membru ASEAN ba Dala-11

Simeira ASEAN-Japaun iha Kuala Lumpur, Malázia. Imajen/RAFA.tl

DILI, RAFA.tl – Reinu Unidu kongratula Timor-Leste nia adezaun ofisiál nu’udar membru ASEAN ba dala-11, no ida ne’e nu’udar hakat  signifikativu ba integrasaun rejionál iha dezenvolvimentu ekonómiku.

Notîsia Relevante: Primeira-Ministra Takaichi Sanae Parabeniza Timor-Leste iha Simeira ASEAN-Japaun Ba Dala-28

Iha komunikadu ne’ebé Rafa.tl asesu husi Gabinete Embaixada Reinu Unidu, Tersa (28/10/2025) hateten, Governu Reinu Unidu kongratula Timor-Leste ne’ebé ofisialmente tama iha Asosiasaun Nasaun Sudeste Aziátiku (ASEAN) nu’udar membru ba dala-11, hodi marka pasu boot ida iha integrasaun rejionál no reflete kompromisu ASEAN nian ba unidade no inkluzividade. Anúnsiu istóriku ne’e hala’o durante Simeira ASEAN ne’ebé hala’o iha loron 26-28 fulan Outubru iha Kuala Lumpur.

Anúnsiu formál semana ida ne’e nian konfirma Timor-Leste nia adezaun tomak, ne’ebé reflete reziliénsia povu nian no ASEAN nian nakloke ba parseria foun sira. Ida ne’e mós loke oportunidade foun ba Reinu Unidu atu hametin kolaborasaun ho ASEAN no Timor-Leste hodi hasa’e kresimentu inkluzivu, estabilidade rejionál no fahe ba malu prosperidade.

Embaixadór Reinu Unidu, Dominic Jermey hateten, ida ne’e sai duni hanesan pasu istóriku ida ne’ebé rekoñese Timor-Leste nia progresu, reziliénsia no ninia inportánsia ne’ebé aumenta iha rejiaun ne’e. Reinu Unidu nu’udar parseiru ba tempu naruk ho Timor-Leste, suporta nia viajen liuhusi programa kapasitasaun umanu oin-oin, hahú husi haforsa abilidade lian Inglés ba diplomata sira, hadi’a saúde no nutrisaun hodi hamenus risku kresimentu ne’ebé la di’ak, no atu hasa’e padraun reguladór sira ne’ebé promove kresimentu inkluzivu.

Esforsu hirak ne’e reflete kompromisu Reinu Unidu nian atu apoia Timor-Leste ho efikásia liu, iha foru internasionál no loke oportunidade ekonómiku boot liubá nia povu.

“Ami hein atu servisu besik liután ho Timor-Leste tanba ami loke dalan ba kolaborasaun ba malu kona-ba kresimentu ekonómiku, negósiu no komérsiu ba futuru ida ne’ebé pasífika, estavél no prospéru,” Dominic Jermey hateten.

Embaixadór Reinu Unidu ba ASEAN Helen Fazey hateten, hoodi Misaun Reinu Unidu ba ASEAN nia naran kongratula tebes Timor-Leste tanba sai ona membru ASEAN, testemuña ida ne’ebé forte ba unidade no ambisaun rejiaun nian.

“Nu’udar ita selebra tinan lima nu’udar parseiru diálogu ASEAN nian, ami hein atu servisu hamutuk ho Timor-Leste hodi promove vizaun ne’ebé fahe ba malu konaba rejiaun ida ne’ebé ligadu, inkluzivu no prospéru liu,”  Embaixadór Reinu Unidu ba ASEAN Helen Fazey hateten.

Reportajen ekipa Rafa.tl