Ramos-Horta Seidauk Haré Jerasaun Foun Ne’ebé iha Influénsia Lideransa

Prezidente Repúblika, José Ramos-Horta. Imajen/Média G-PR

DILI, RAFA.tl– Prezidente Repúblika (PR), José Ramos-Horta, seidauk haré jerasaun foun ida hatudu nia lideransa no influénsia atu kontinua obra ne’ebé eroi pátria sira husik hela.

Notísia Relevante: Ramos-Horta: Xavier do Amaral ho Nicolau Lobato Fundadór RDTL

Prezidente Repúblika (PR), José Ramos-Horta hato’o nia deklarasaun ne’e iha ámbitu Timor-Leste selebra tinan osan-mean (Bodas de Ouro) proklamasaun independénsia, 28 Novembru 1975-28 Novembru 2025, liuhosi programa “Meet the Press”, iha Palásiu Prezidensiál, Kuarta (26/11/2025).

“Problema mak ida ne’e, hahú 2002 to’o ohin, seidauk iha líder ida jerasaun foun ne’ebé kapta imajinasaun nasionál, ne’ebé hetan no fó inspirasaun maka’as ba jerasaun foun laiha liu. Iha líder ne’ebé ha’u haré mak Fernando Lasama de Araújo, maibé nia impaktu mak nia mate tiha ona,”  Prezidente Repúblika José Ramos-Horta hateten.

Xefe Estadu hatutan, bainhira Fernando Lasama mate, implikasaun ba lideransa partidu nian no Mariano Sabino ho sira seluk tan iha Partidu Demokrátiku (PD) ne’e jerasaun foun, maibé to’o ohin loron PD hetan de’it maka kadeira neen (6), la signifika jerasaun foun la iha.

“Ohin ha’u bele hateten  laiha,  tanba jerasaun foun iha tiha ona tinan 20 resin nia laran tiha ona, para komprova  ka hatudu  jerasaun foun nia kapasidade lideransa laiha.  Ba eleisaun kandidatu Prezidente iha tinan 2022, iha kandidatu  na’in-12 kedas, balun la hetan votus no balun hetan votus ne’e jerasaun tuan,” Horta tenik.

Durante ne’e jerasaun foun sira sempre dehan, jerasaun tuan ne’ebé hanesan líder Nasionál sira mak lakohi fó oportunidade, maibé ne’e lalós, tanba Timor-Leste opta demokrasia  ne’ebé ema hotu iha direitu atu  kompete, maibé depende fali ba povu atu hili no deside.

Nia haktuir, desde Primeiru Governu Konstitusionál kedas, tempu Marí Alkatiri nian, tur iha ne’ebá, estuda elementu governu sira, hateke ba sira, rona sira nia intervensaun, elementu ida ne’ebé sempre admira desde momentu ne’ebá mak Dr. Rui Araújo, iha konsellu Ministru nia la ko’alia mangame kuandu iha debate, haré ema ne’e estuda dokumentu lubuk, pájina atus ida nian, ida ami simu semana ida antes nia  estuda ka lae, tanba buat sira ne’e ha’u akompaña, nia estuda, ema ida ne’ebé matenek.

Ramos-Horta subliña liután katak, akompaña deputadu sira  husi  tinan 2002 mai to’o ohin loron, iha deputadu balun maka hatudu duni sira nia matenek, ko’alia mós tuir disiplina, maibé deputadu balun ba ko’alia maka’as ho lian boot maibé la kontrola.

Reportajen ekipa Rafa.tl